موضوع كتب للعيارين / عبيد وتزييف لحقيقة حصة الاستغلالية !!!

ابو عبيد ماقد فرح ان احد ياخذ شي من بقالته

 دون ما يحاسب الا هالمرة يوم شاف عبيد ماخذن له دفتر ابو ثمانين ورقة 

 وقلم ابو نص
 وطالع من البقالة ذيك الساعة حس ان عبيد اطلق من شبراوي مدرس عبيد في المدرسة
 وحس انه ابو عبيد العبقري وكيف لا وعبيد يسرق دفتر ابو اربعين وقلم
بالعادة يسرق ليز كبير بالكاتشب

 والا ميرندا بالفراولة

 والا مناديل حجم عادي
هذا اللي متعود عبيد يسرق وكلهن ماقد استفاد منهن ابد مغير حصيصة
هي اللي تخليه يجيب لها الاغراض يضرب الحب شو بيخسر يبو عبيد
 وياليتك ياعبيد حابن لك وحدتن زينة كان تستاهل هالاغراض بس مالقيت الا حصيصه
اللي براطمها كنها مغراف شيول لا عاد على قولتك ممشوقة القوام
 اي ممشوقة القوام واللي يرحم والديك قسم بالله لو تشوف وجهها ان تنحاش
 ولا يردك الا برنامج خبرني ياطير اللي بقناة سوريا
تصدق عاد ياعبيد طبعا هو هنا يحاكي عمره
 بس يتخيل عبيد يسمعه تصدق ياعبيد هاللي تقول ممشوقة القوام تذكرني بكابرس كان عندي

 الله يذكره بالخير من جد البودي ما لمسه الشاكوش على قولة الشريطية
بس القير لك عليه والمكينة مخبطةحتى قزاز الدرايش ماينفتح
 مغير مهويه اربع وعشرين ساعة عاد لو تطل من تحت مغير انواع الزيوت تنقط
 اي والله هالحين عرفت ليش بنت اللذينا اغلب طلباتها منك مناديل اثر الزيوت تنقط
 بس معليش ياعبيد يمكن هالدفتر يصير فاتحة خير لك وتتعلم وتصير رجال
 وتخطب لك مدرسة تنقط عليك من هالدراهم بدال هالزيوت
يتجه عبيد للبيت ويفتح الصفحة الاولى من الدفتر ويقعد يفكر نص ساعة
 همن يكتب :
 بسم الله الرحمن الرحيم
ونص ساعة ثانية ويكتب كلمة وحدة  :مسلسل
ويوم كتب مسلسل وهو اللي يتذكر مسلسله المفضل سفنج بوب

 على قناة نكلوديون واللي خلاه يحب هالقناة انه دايم يتخيل نفسه مع صفة هالبزران
 اللي يقولون : نيكلوديون شبهي وش زودهم عني وش حليلي اسمر وحليوه

  حليوة اليوم مخاصمني المهم نطل عبيد الدفتر
وراح يتفرج على سفنج بوب ويوم خلص سفنج بوب رجع يكتب المسلسل اللي بباله
كان عنوانه مسلسل عبيد والحب
وكتب تحت عنوان فرعي : كوميدي واكشن ورومانسي
يبتدي عبيد بهالمسلسل بسرد قصة حصة ومغامراته معه وحبه لها بس اللي ماقدر يعرفه :
 هل حصه تحبه والا لا
وكانت فكرة المسلسل عن ان حصة اتصلت مرة تطلب ليز بالكاتشب
خق مع صوتها قام يتميلح وقال فيه ليز بالملح والقبلة
 قاعد يكلمني فاستغلت بنت اللذينا هالخقة
 وقامت تتلكع عليه وقالت مااحب الا ليز بالكاتشب
 قام هو يستخف دمه قال برسللك ليز بالملح والخل ومعه علبة كاتشب هدية
لاننا غلطانين ماوفرنا طلبات الزباين ومن ساعتها عرفت تستغل الضعيف
 وتطلب منه كل شي تبيه
طيب بتسالون وشلون عبيد يكتب هالكلام في المسلسل ؟
 نقول لكم انه كتب هالمسلسل عقب ماتزوجت حصة من مديرة في العمل
فحب يفضحها ومن زود القهر قام يفضفض على باله بيبتزها هالذئب البشري التايوان
عبيد لازال يحتفظ بخمسين ريال مشقوقة

 ما تمشي ابد ولا احد يقبلها واصلته من حصة
 بعد ما طلبت طلبات ويوم جابهن عبيد وحاسبته الشغالة لقى هالخمسين المشقوقة
 واللي كاتبة عليها حصة الى حبيبي عبيد مع التحية خذ الخمسين وهو فرحان بهالحب
وعطى الشغالة الاغراض ورجع لها الباقي
يعني حصة اخذت اغراض بلاش وفلوس الباقي بعد وتخلصت من خمسين مالها قيمة
ويوم اتصلت ثاني مرة على عبيد تطلب اغراض وهو يسالها وش سالفة الخمسين ظ
 قالت وه بس ياعبيد بينقطع الاتصال خلص شحني قام عبيد قال ولا يهمك
 وهو اللي يفتح درج بطاقات الشحن ويسحب بطاقة شحن موبايلي

 ويكشطها وقعد يملي الرقم عليها قالت لا خلاص بسكر وارسل الرقم برسالة
وشوي وهو يرسلها وبعد شوي يتصل عليها هو - انواع الاستدلاخ - هاه بشري وصل الرقم ؟
 قالت ايه ماتشوفني اكلمك والله مايغلى عليك شي يا عبيد !!!!
وتذكر عبيد سالفة الخمسين وهو يسالها وش سالفتها ؟
 فجاوبته ابد تعبير عن حبي لك كتبت لك على هالخمسين عشان تعرف انك غالي وماتهمني الفلوس
عندها سال عبيد طيب ليش مشقوقة قالت ابد محتفظة بجزء منها تذكار علشان اتذكرك فيها
 والى تزوجنا نطابق الجزئين على بعض
 جازت له السالفة وقال تصدقين انك مثقفة وراعية افلام
 ذكرتيني بفلم قد شفته عصابة مخدرات تسلم البضاعة بدولار مشقوق
واللي معه الجزء الثاني هو اللي يستلم عشان محد ينتحل الشخصية
المهم ان عبيد قعد يكتب سوالفه في المسلسل

وفجأة توقف وقال ياربيه من بيقوم بالبطولة الرجالية ؟

 البطولة النسائية مقدور عليها وجاهزة واللي هي شيماء علي

 نفس البراطم الخالق الناطق بس البطولة الرجالية محتار بين

 بشير غنيم

 وبين عوض عبد الله

هذولي اللي يشبهوني من جد
نام عبيد ذيك الليلة وهو يفكر بالمسلسل
وفي واحد من احلامه كانت حصة مخطوفة

واللي خاطفها يطلب فدية مليون ريال

 قال لبوه يبه ودي اتوظف ويوم ساله ابوه ليه قال ابتوظف عشان يصير لي راتب

وجازت السالفة لبوه وقال اي والله ولدي السنع توك تبدا تفكر صح

تتوظف ويصير لك راتب وتصير رجال تكد على عمرك

 انت وزوجتك قال عبيد خلهم يفكونها عيال الحرام

 واستغرب ابوه وقال له عيب عليك ياعبيد تقول عن جيراننا هالكلام

 صحيح انت تعطيهم الاغراض من وراي ولا يحاسبون

وصحيح ان ولدهم راعي عرق

 وصحيح ان شغالتهم خاقة مع السواق

 وصحيح ان امهم طقاقة هي وبناتها

 وصحيح ان ابوهم شريطي مواتر غشاش وابن كلب

 بس ماتاصل المواصيل انك تقول عنهم عيال الحرام

 ويتفاجا عبيد بهالكلام ويرد على ابوه

يبه ماكنك كبيت عشاهم؟

 ومع ذلك يبه على قلبي زي العسل 

بس لعلمك منيب اقصد عيال الحرام اهلها اقصد اللي خطفوها
- بالله حصة مخطوفه ؟ وين هاللي خطفوها
- ايه هذا الابو السنع والجار الشقردي

 والله اني عارفك يبه راعي فزعات اكيد بتروح تفكها منهم
- لا والله الا بشكرهم واشد على يديهم

والمشروبات علي كلها ماقصروا فكونا منها هالمنشار

 اجل اربع وعشرين ساعة ليز وزبادي طيب الليز تاكله بس ليش زبادي مع كل كيس ليز
- حرام عليك يبه تراها بنية حلال وانا اللي اقول بتفزع وبتفكها ؟

بس عشانك بجاوب الزبادي الله يسلمك يصلحون منه الصوص

 اللي يحبه قلبك المهم ودي اتوظف مو عشان اللي قلت

 لا والله انا ودي اتوظف عشان يصير لي راتب واقسط دداسن

 وادفع فدية حصة وافكها واصير بطل واتزوجها
وهاللي فديتها دداسن كم فديتها وانا ابوك مية الف؟
رد عبيد ياليتها مية الف كان بسيطة نبيع البقالة ونطلعها بس المشكلة يبون مليون
يرد ابوه مليون؟ 

والله لو انك جورج قرداحي بتعطيها مليون
لا ومن زود الهبال بتبيع البقالة؟ 

اي والله صدقت ياغوار يضرب الحب شو بيخسر
اقول ياعبيد ادحر الشيطان واترك خرابيطك 

وخلهم يخطفونها ويفكونا منها وانت فكر في غيرها بنات الناس واجد
وماكان من امر عبيد الا انه يفكر بخطة بديلة

لانقاذها من المختطفين تتمحور حول انه يهاجمهم بالشروخ والالعاب النارية

 وبكذا يباغتهم ويفك اسر حبيبته وهو اللي يروح ويسرق له خمسمية ريال

 من البقالة وطوالي على سوق الحمام

ويشتري بالباقي من الخمسمية العاب نارية

 وشروخ وصواريخ ويوم بغى يرجع حصل الفلوس منتهية

 وهو اللي يدقها رجلية الين البيت وفي الطريق لقى ناس وسالوه عن اللي معه

 قام يبيع عليهم وبعد شوي لقى في الطريق ناس غيرهم وباع عليهم

 ويوم وصل للبيت لقى الشروخ مخلصة ومعه الف وميتين

 قام عطى ابوه خمسميته وذب نصفهم في البحر كم يطلع عمر عبيد؟ ههههه

 لا اللي صار يوم عطى ابوه الخمسمية ماقال اني سارقها وابرجعها

لا قال هذي هدية لك يبه انا فتح الله علي وصرت تاجر وكل هذا بسبب حصيصة

 اللي خلتني اعرف هالتجارة 

ايده ابوه وقال فكرة حلوة خل نتخاشر انا واياك وتبيع في البقالة والنص بالنص
وبدا عبيد يبيع في البقالة طبعا هالكلام كله في الحلم

ويوم قام من النوم وخو اللي يحمد الله ان حصة ماانخطفت

 بس اللي اعجبه فكرة الالعاب النارية ومن ساعتها نسى سالفة المسلسل

وبدا عبيد فكرة مسلسل خاص فيه اللي هو الطريق نحو الثراء

 ونسى حصة وسحب عليها وصارت تحاسب اول باول

 وبالعكس صار هو اللي يلعب عليها يزود بالاسعار وياخذ الهدايا

 اللي تجي مع مناديلها ويزرفها واستمر في لعبة بيع الممنوعات

وتطورت تجارته ودخل مع الالعاب النارية

 فكرة بيع العرق 

وقال لنفسه كلها ممنوعات نبيع ونترزق الله

 واللي يبي نبيعه مناب بايعين الناس غصب
وتطورت الين خش بالحشيش 

والترويج على اصوله

 الين جاء ذاك اليوم اللي مسكوا عبيد بشحنة حشيش وحكموا عليه بالاعدام
كل هذا ما سبب لعبيد اي غضب ولا انقهر منه

كل اللي قهره ان السؤال اللي بباله واللي مالقى له جواب الين الحين هو السؤال التالي : 
دام انها بنت الكلب ماتحبني ويقولون انها تستغلني

 وتلعب علي ليش اذا جت للبقالة وانا بلحالي ليش تدنق وتناظرني وتضحك؟
مايستفاد :
ننصح جميع البنات لا تدنقون في اي محل فيه رجال 
تجارة الممنوعات تجارة طريق سريع للثراء وللاعدام في نفس الوقت
ياعبيد الدلخ اللي تتصل عليهم مايخسرون شي من شحنهم
التقسيط طريق يودي للديون بس مايفك ازمة
====
تمت