صادّ

خبرتوا حدٍ يبكي على واحدٍ يبكيه !!!

2012-01-22T09:08:00.000+03:00

للمرة الأولى يسمع ( بيشة)
سمعهم يقولون : راحت لبيشة
ذيك الساعة اختلطت في ذهن الطفل ذي العشر سنوات
مشاعر متناقضة
بين أن يكره ( بيشه)
تلك التي أخذت منه أعز إنسان عرفه
أمه
وبين أن يحبها لأن أعز إنسان أيضا أنتقل لها
***
لي أيام مدري وين دارك ولا أدري ليه
وأنا خابر إني باب شفك ومزلاجه
بين هذا وذاك
كان ينتظر درس الجغرافيا
ليسأل المدرس بلهجة المتعطش للمعرفة

* أستاد ممكن أسألك سؤال ؟
* اسأل
* وين بيشه فيه ؟
ورسم لأحلامه طريقا يمر عبر تلك الخريطة الكبيرة الملونة

التي يحملها المدرس في ذهابه وإيابه
وجاء الجواب مختصرا :
ما ورا بيشة عيشه
وصفعه الجواب
وربما في لحظة انتصار على قرار والدته
بدأ في تفكيك هذا الجواب
وتحليله ليخرج بحقيقة لم ولن يشك فيها
زواج والدتي المطلقة خطأ
ولن تجد الراحة هناك
ومع لك
ظل الحزن يلازمه
ولم تستطع جدته ( أم أبيه)
أن تملأ الفراغ الحاصل من زواج والدته
هنا تبدأ رحلته مع الفراق
ومع الفقد
كانت والدته لبنة أولى في ها الطريق الموحش من وجهة نظره .
***
وترى قصرنا اللي كم سنة نجمع ونبنيه
هوى العذل طيح بابه العود وسياجه

بدات الأمور تتجه نحو النسيان
وربما
ذهابه مع والده لرؤية
بيتهم الجديد
الذي لا يزال في طور البناء

يعيد بعض بقايا الذكرى
لا يزال يتذكر كلام والدته
هذي غرفتك
وذي غرفة مشاعل
وذي غرفتي أنا وابوك
ويأتي التساؤل :
يمه غرفتك بعيده ليش؟
علشان تنام بهدوء انت ومشاعل
وبعدين وأنا امك تراني قريبة منك
حتى لو صارت غرفتي بعيدة
هنا تمنى لو انطبق الكلام حرفيا
وأصبحت قريبة
وكيف يكون القرب وهي في ( بيشة)
وكم أصبح لا يحب هذه العمارة الجديدة
وعندما يستبد به الشوق يحبها ويطلب الذهاب مع والده لها
تماما ( كبيشة)
مشاعر مختلطة لا يعرف لها استقرارا ولا ثباتا .
***
ياهيه إلتفت لي وإسمع دعاي لك يا هيه
ترى عادتك تشبع من البعد واتواجه

في حصة التعبير طلب منهم المعلم
موضوعا مفتوحا
اكتبوا اللي تبون

عبروا عن أي شيء
وهنا ارتسمت بسمة على شفاهه
سأكتب رسالة لأمي
قالها بينه وبين نفسه
ربما شوقا وربما حزنا وربما نداء للرجوع
كتب :
أمي
والدتي
كم أنا أحبك
السلام عليكم ورحمة الله وبركاته
كيف حالك
متى بتجين يمه
بيتنا الجديد بيخلص وما شفناك
يمه تعالي
خلاص بنوم بدري
بذاكر دروسي
بصلي في المسجد وبروح قبل الإقامة
وبسجل في التحفيظ
بس تعالي
يمه طولتي
ما شبعتي من فراقنا
حنا شبعنا وملينا
تكفين يمه تعالي
***
دعيتك بصوتٍ ياصلك ليه ما توحيه
وأنا أسمع ضلوعك من صدى الصوت لجاجه

كانت الأحلام متنفسه الوحيدة
بدون أن يشعر تأتي له بمن يريد
بمن يحب
رأى يوما في حلمه
والدته
وهي تقرأ رسالته

تقرأ مشاعره
التي كتبها في دفتر التعبير
تتساقط الدمعة من عينيها
وتمزق الورقة وتضمها لصدرها
وتناوله الدفتر
يمه كان ضميتيني بدال هالورقة

يمه تصدقين
للحين أتذكر يوم أطيح من السيكل
أتذكرك طلعتي للحوش
وضميتيني
وسميتي علي
وانا قاعد أضحك
روعوك يوم قالوا طاح
وما نسيت أبد ترى ذاك اليوم سألتك
يمه ليش قلبك يدق بقوة
علشانك يا وليدي
بس مافيني شي
ولو خفت عليك
يمه تصدقين
ودي أطيح من السطح
وتدرين
عشان تضميني مرة ثانية
***
غيابٍ بلا سبة هجادٍ بلا تنبيه
وجفا أغلى العرب نارٍ على الكبد وهاجة

حمل حلمه في قلبه
وانتظر مدرس القرآن حتى خرج من الفصل
ليسأله عن حلمه
ربما هو الوحيد الذي يثق به
ملامح التدين ولحيته الوقورة
وتعامله الحسن مع الجميع
جعلته يتجرأ
ويلحق به
لم ينتظر المدرس بل بادره بالسؤال
سم يا مشعل وشفيك عسى ماشر ؟
معليش أسالك سؤال يا استاد
اسأل
أحس المدرس برغبته أن يكون الحديث
خاصا
انتحى به جانبا
وهنا جاء مدرس الحصة التالية
ليبادرة مدرس الدين
ترى مشعل معي دقيقة ويجيك
أبد تامر يبو سعود لو تبي الفصل كله
استاد أمس شفت حلم
وودي أعرف تفسيره
خير ان شاء الله
وقص مشعل الحلم على مدرسه
وسأله :
امك معك في البيت؟
لا ببيشه؟
وراه ؟
هنا تغير الحال
أن تبحث عن إجابة لتساؤل ملح
في ذهنك
تتفاجأ بأن الجواب ينبثق عنه تساؤل
لم ولن تستطيع الإجابة عنه
ربما لصغر سنك
وربما لتعمدهم إخفاء السبب
وفي كل الحالات
لا تملك جوابا مقنعا
لتساؤل مرير
ليش أمي راحت لبيشة ؟
***

عسى منزلٍ ضمه حقوق الوسم تسقيه
وتضحك له الدنيا وهو يضحك حجاجه

في جلسة والده الشتوية في الملحق

لا يزال يتذكر
نشرة الأخبار
والمذيع يبدا
هطلت أمطار غزيرة على كل من
وادي الدواسر
السليل
نجران
بيشة
عندها ضغط الأب على الريموت
ليغير المحطة !!
ومع ذلك سمع الاسم (بيشة)
الذي ما كاد يسمعه
حتى تسارعت دقات قلبه
وتمنى لو كان قطرة مطر حتى يختار الهطول هناك
***

أحبه ولا أبغضته على شيٍ يسويه
ولا زالت رقاب الرجا فيه منعاجة

كان الكلام يدور بين جدته
ووالده
حول ضرورة زواج والده
يتسرب بعض الكلام لمسامعه
ومن هذا الكلام نوع من العتب على أمه
اللي خلت عيالها وتزوجت ولا سألت ولا اتصلت
ومع هذا الوصف
وهذه الصفات لم يتسلل الكره لقلبه
ومازال الأمل يحدوه برجوعها لهم
خصوصا بعدما سمع الكلام عن مرض زوج والدته ودخوله المستشفى .
***

ترى العفو قد جاك أوله وإغتنم تاليه
وترى الحلم بحرٍ غير لا تامن أمواجه

أخبار مرض زوج والدته
جعلت الحديث يدور عن رجوعها
لهم خصوصا عندما سأل أباه
في لحظة جرأة نادرة
يبه لو يموت زوج امي
بتخليها تجي ثاني مرة ؟

اها بس وش هالكلام
امك هي امك ان بغت
تجيكم فالله يحييها
البيت بيتها
بس ما ظنيت تجي .

***
يموت الأمل لكن ظنون الغلا تحييه
وعروق الوفا فالروح والقلب وجاجة

خبر خروج زوج والدته من المستشفى
جعله يتراجع قليلا عن آماله
برجوعها
ويحاول التأقلم على محو كل بارقة امل
ولكن هل يستطيع؟
ربما لو تخلص من بعض الغلا
وقليل من الحب لاستطاع ذلك
وأنى له ذلك؟ !!!
***
وترى الود ليلٍ مظلمٍ جيتلك ساريه
سراجه وصالك والجفا ينفخ سراجه

في حصة التربية الفنية
كان الكلام للريشة
فتح كراسته

وأخرج ألوانه

رسم في زاوية الورقة
مصباحا مضيئا
ولوّن بقية الورقة بالسواد
ومن هذا المصباح تنبثق
أشعة تصل للزوايا الثلاث
الأخرى من الورقة
في الزاوية العليا كتب
تحت صورة رجل رسمه :
ابوي
وفي الزاوية اليمين
رسم طفلا وكتب تحته :
مشعل
وفي الزاوية اليسرى رسم بنتا
و كتب تحتها : مشاعل
***
نضج قلبي من البعد وش حاجتك تكويه
جفاك الجمر والصبر في بعدك الصاجه

وللملحق حديث آخر
وللشتاء طقوس مختلفة
لعل أحدها شبة الضو

في انتظار والده وضيوف والده
جلس وحيدا
لينفذ وصية والدة :
شب الضو وانا ابوك
أخذت يده تلعب بال (ملقاط)
بينما تفكيره
لا يزال في رحلته اليومية
لها
لم ينتبه إلا للحراة وهي تلهب وجهه
ليرمي الملقاط
وينخرط لوحده في نوبة من البكاء
***
خبرتوا حدٍ يبكي على واحدٍ يبكيه
وخبرتوا حدٍ مسجون ما يبغي إفراجه

نوبة البكاء لم تتوقف

إلا عندما دخل والده لوحده
منتظرا الضيوف
لينهر مشعل
قسم بالله ما تستاهل هاللي تبكي
عشانها
ولا دمعة وحدة من دموعك الغالية
ترى هي السبب
ولوها ما خلتكم وراحت
كان مابكيت هالبكاء كله
وتأتي لحظة من التأييد وربما التفكير
لحديث الأب المنطقي
من وجهة نظر العقل
فعلا هي السبب فراقها
خلاني أبكي
ليتوقف التفكير
وتعود عروق الغلا وشرايين
المحبة تضخ شيئا من الحنين
لمن جعلته يبكي يوما ما .

وطبع حبك بقلبي والأيام ما تمحيه
هذا هجرك يحاول يموجه ولا ماجه

حديث والده مع ضيوفه
وتطمينهم لوالده
عندما قالوا :
بكره يكبر وينسى
جعله يقسم بينه وبين نفسه
أنه لن ينساها
وسيبقى يحبها
الين يوم القيامة
هكذا فكر وهكذا رغب
وهكذا أوصله غلاها
ليوم القيامة !!!

***
عليك الفؤاد إخلاجه مصمخ راعيه
خف الله في راعيه ما تسمع إخلاجه

لم يعد للمكان قيمة
ولم يعد للزمان من وجهة نظره أهمية
هي ثواني
تشكل دقائق
تتجمع لتصبح ساعة
لتتحد مع رفيقاتها فتصبح
يوما يضاف لأيام فراق والدته
التي أخذ يحسب عددها
ليفيق من لغة الأرقام
على نداء والده
هالحين انت ورى ما تصب القهوه
أصقه انت ؟
وكم تمنى لو أجاب
نعم أصقه
لم أعد أسمع سوى
صوت الدقائق البغيض
وضجيج الأيام المتوالية
التي لا يمكن لها أن تتوقف .
***
فقد خاطري شي من الضيقة مسليه
وغدت روحي من الناس والليل هجاجة

لم يعد الشاب طفلا
أصبح يقود سياره
مفاتيحها في جيبة
ومع ذلك
فرحه الأكبر كان
إمتلاك قراره
لا امتلاك سيارة
عندها
أصبح يرفض مرافقة والده
في زياراته لأعمامه
وجيرانه
بل امتد الرفض والاعتذار حتى عن المشاركة في استقبال ضيوف والده
و(صب القهوة)
امتلك تفكيره شيئا واحدا
وروحا واحدة
أمه
***
أروح لمكانٍ خابره .. خابره يأتيه
أسوق القدم صوبه وهي مالها حاجة

بيت جدته لأمه
كان مقصده الدائم
ووجهته المعتادة
يضرب الجرس
فتفتح الشغالة الباب
يدخل ليقبل رأس جدته
ويتقهوى معها
ثم يمرعابرا على (المقلط)
مكان جلوس خالاته إذا جو
يفتح الباب
يملأ صدره بالهواء
ويغادر وفي عينيه بقايا دموع
مسحها بكم ثوبة .
***
مكانٍ نزيه وأول مواجهي له فيه
وأنا خابرٍ ما رجل مثله بدواجة

مشعل وانا ابوك
وش عندك في حارتنا القديمة
يبه أزور أصدقاي
بس كل ربعوا شدوا
وما بقى في الحارة أحد من جيراننا الأولين
يبه أحب أمر من عند بيتنا القديم
بس خلاص وانا ابوك بعناه
ولو أحبه وأحب أمر من عنده
وعندها تمنى لو استطاع أن يري والده
صورا التقطها لبيتهم القديم
ومن زوايا مختلفة
احتفظ بها في قلبه
قبل أن يحتفظ بها في البوم صور ضخم .
***
لعل وعسى ما حدني للمجي يدعيه
وأشوفه وأنا ما ودي أسبب إحراجه

سألهم دكتور قسم
( الكيومسترى) في كلية العلوم

عن رغباتهم
في المستشفيات التي يرغبون التطبيق فيها
اختار (التخصصي)
هناك يرقد زوج والدته
وهناك بارقة أمل أن يراها تزوره !!!
***
يحب الجريح آخر دروب اللقاء ويجيه
وتحب القدم جية مكان أول مواجه

المشهد الأخير
سيارة كامري 2011

يصدح السيدي بها بالشيلة التالية

http://www.youtube.com/watch?v=HGy4H3hPWqY

وهي تسير في اتجاه الجنوب
وبسرعة مقبوله
ويلمح الشاب السائق
لوحةعلى الطريق :

بيشة : 25 عام !!!

===
* الأبيات لبن فطيس
* القصة خيالية

سعد الـ (فالح) !!!

2012-01-21T22:12:00.000+03:00

تركي حبيب قلبي
وصديقي
يعرف وش أحب ويعرف ذوقي
قبل كم يوم مرني وقال : تخاويني للابل
وبيني وبينكم ماقال : للابل
قال للبل
بلهجته الرائعة
قلت أروح بشرط
قال : جاك
قلت وش جاك؟
شرطك
قلت له أول اعرف وشو همن قل جاك
يعني وش بتطلب ؟ ناقة؟
ما ظنيت
انت وجهك وجه نياق؟
قلت بروح بس وشرطي أبيك ترجعني بدري
وراي بكرة شغل واجد
وش وراك
أكيد بتكتب لك موضوع بالقهوة
والا بتسولف بتويتر
وش فيه تويتر بعد؟
خلها على الله
اركب بس والساعة اللي تبي ترجع فيها برجعك
لا وابهديك سي دي
ركبت وعلى طول شغل السيدي
اللي هو

وعلى طول ضغط الارقام حقت الأناشيد الين وصل للرقم 8
اللي هي هالأنشودة

http://www.youtube.com/watch?v=pODSpQ8Ar50

ومن يوم سمعتها
وأنا أقول عز الله جبتها يا تركي وانت ماتدري
لو اني مدور هالنشيدة مالقيتها
هذي تصلح لموضوعي الجديد
وبتركب عليه 100%
أكيد موضوعك اللي صجيتنا بالاعلان حقه؟

ايه موضوع سعد الـ (فالح)
رجعت للبيت
وأنا في ذهني هالأبيات الرائعة
وبديت أكتب :

سعد الـ (فالح)

كنت أخش الإقلاع

أقرا واطلع
ويوم استمريت بالقراءة
حسيت اني ودي ارد
على بعض المواضيع
ساعتها فكرت بالتسجيل
وماكن العائق إلا شي واحد
اختيار اليوزر
وبيني وبينكم كانت اليوزرات
أغلبها ذاك الوقت
تنحو منحى الأسماء العيارية
أو الضاحكة أو الساخرة
وما كنت أشوف نفسي
في هيك خط
قلت ليش ما أفكر في يوزر جادّ شوي
فكرت في أسماء
ويوزرات كثيرة
واستقر الراي على صادّ
وما أخبي عليكم
كان عندي ايميل باسمي
الحقيقي ولا يزال شغال
بس يوم فكرت بالتسجيل قلت
لازم أسوي ايميل خاص
بالاقلاع ويتواكب مع اليوزر
اللي هو صادّ
فكان الايميل sad
وقعدت ازيد حروف وارقام
الين لقيت شي ما بعد وخذ

ومن يومها صاروا كل اللي
يقرون الايميل
او حتى يوزري في الفورم
والتويتر فيما بعد
يحسبون اسمي سعد
يعني يظنون ان اسمي سعد
حتى ان فيه
بعض اعضاء الاقلاع
بعض المرات يلخبطون
بيني وبين مستر سعد
مشرف القهوة المميز
والوفي
يحسبونه انا او يحسبوني هو
رغم انه متفوق علي
حرفا وشكلا وتميزا
ومن ذاك اليوم صار اسم سعد
قريب مني
لدرجة اني افكر اذا لقيت
وحدة توافق ترتبط
بصادّ بكل عيوبه
وسمار بشرته وشعر رأسه المجعد / فليفلة
ورزقنا الله بولد
بسميه سعد
بالرغم من اللي يعرفوني
زين يقولون هلا ابو خالد
كنت أحب ابو خالد
الأمير
والصوت الجريح
ووحيد الجزيرة
رحم الله من مات
واطال عمر الحي
بس فكرت اغير
من عقب تسجيلي في الاقلاع
خطمة //بس ماتلاحظون
ان من وحنا صغار يلصقون فينا
كنية
ابو خالد
ابو فيصل
ابو ناصر
الخ
تخيلوا وربي صدق
ان واحد قلطت عنده
يسولف علي
ويقول ان ابو عبدالله
بيجيب القهوة
ويوم جاء والاه ولده
اللي برابع ابتدائي

خلصت الخطمة
بس من جد ابو سعد مناسبة لي
وخصوصا ان اسم سعد خفيف
ويستخدم بالشعر والقصيد
اللي هو هواية عندي
وكرموني المنتدى النبطي
بالاقلاع بلقب شاعر
وهذي شهادة اعتز بها
وسعد منتشر
في المملكة بشكل كبير
واحس انك لو تروح للحراج
والا لمعارض السيارت
وتقول سعد
بيلتفت عليك عشرة
ومن أشهر الأبيات اللي
ورد فيها هالاسم
هي تمون العين والا ماتمون
لا خذت قلبي وقفّت ياسعد
وهي للشاعر الكبير
الأمير خالد الفيصل
واللي منها
احسب ان الرمش لا سلهم حنون
واثر رمش العين ما ياوي لاحد
اي والله ما ياوي لحد
تصدقون بديت اصدق ان ولدي
بسميه سعد :

تعالوا نتخيل :
يبه يبه
سم وانا ابوك
ودي تعلمني ليش سميتني سعد
ارد عليه بالبيت المشهور لأحد الشعراء :

يا سعد لا تحاول كل شي تعرفه
خل الاسرار تبقى في القلوب الحزينة

وفعلا تبقى الأسرار مقفلة
في قلوب حزينة ابت إلا أن تمارس
الصمت تجاه أمور وأحداث
رسمت على خرائط القلب
ندوبا
لا يمحوها الزمن
ولو اخترت اسما لابني الافتراضي
اللي ما بعد جت امه
لاخترت
فالح
على اسم والدي
طيب حنا فيها يبه
سمني فالح
لا انت سعد
وبتصير فالح ان شاء الله
اجل فيه حل وسط
خلاص انت سعد الـ فالح
خلاص يبه حبيت هالاسم
حلو ومعبر
خلاص من اليوم
أنا سعد الفالح

غلاك عنـدي لـو تنكـرت زايـد
قربـت وإلا بالغـلا تبعـد الشـوح

سأتخيل سعد يكبر
وسأبذل جهدي
وكل ما أستطيع
لا لشيء سوى أن يبقى سعدا
اسما على مسمى
وهكذا اردته
وهكذا خططت له
احببته من قلبي
يمرض فأعالجه
يطلب فألبي طلباته
استقطع من مرتبي المتواضع ومن لقمة العيش
لاعطيه
سأشتري له سيارة فاخرة
ايه فاخره
ابشتري له لكزس
لو بالتقسيط
واذا كبر وبغى الزواج بزوجه
وبرقص في عرسه بالسيف
سعد الفالح
كنت اراه رمزا للتفوق
للنجابة
لكل ماهو جميل في الحياه
كان أملا
كان شمسا انتظرها تشرق
الناس في المجالس
يحطون صورة راعي البيت
والا صورة ابوه
او على الأقل شجرة العائلة
انا خالفت هالعادة
حطيت صورة سعد
ايه سعد
ماشاء الله
الله يصلحه ويخليه لك
بس ماكنك شطحت
وبالغت في وضع صورة سعد؟
لا والله ما بالغت
يستاهل غالي ويبيض الوجه

وأنـا بحيـل الله صـدوق الوعايـد
أصبر ولو قلبي معـذب ومجـروح

قلت له مرة :
شف وانا ابوك
سو اللي تبي
بس ابيك تبيض وجهي
واطلب اللي تبي
بعطيك حسب ما اقدر
وبابذل جهدي تتعلم
في احسن المدارس
تلبس أحسن الملابس
تاكل أفضل أكل
وابيك تصير شي
افخر فيه
ابيك تصير مستحق لوضع صورتك في المجلس
ابي الناس تقول
سعد ونعم الرجل
الوفي اللي ما نسى اهله وربعه
بس وانا ابوك
بشرط عليك شرط
كانك تحبني وتعزني
وتقدرني
لا تروح تدرس برا
ابيك تدرس هنا وتتخرج
ابيك تصير قريب مني
خابرني كبير ومريض
وبحتاجك
توديني للمستشفى
تجيب الدواء لي
تدفني على الكرسي
اذا مرضت
توديني لمواعيدي بالمستشفى
و خلونا نتخيل ان السنسن مرت
وتخرج سعد من الثانوية
ودرس في الرياض
في

جامعة الملك سعود
اللي سميت باسم الملك سعود
هذا الرجل الذي يعتبر
واخوانه الملوك والامراء
مدرسة في التميز
والتطور
فهو الذي أنشأ وأسس جامعة الملك سعود
حتى أصبحت يشار لها بالبنان

ماشاء الله سعد تخرج
والف مبروك
الله يبارك فيك
وش بيسوي
والله مدري بس
جامعة الملك سعود موجوده
ويكمل دراسته فيها
عرفها وعرفته وهو صغير
وهو توه ابو 18 سنة
يعرف القاعات
البهو
المسرح
المطعم
المكتبة
الممرات اللي تربط بين الكليات
يعرف حتى السكورتيه
ويعرفونه
ودرس فيها الين تخرج
وش بتسوي لو بيروح يدرس برا
مدري بس يمكن اموت
واللي ادري ومتأكد منه بكتب موضوع عن رحيله من البيت

لـو رأس مـال مدوريـن الفوايـد
بقي لهم ما صار ناصح ومنصـوح
يضغط صاد أيقونة موضوع جديد
هالموضوع بمناسبة رحيل سعد
حبيبي سعد
ماتدري شكثر بكيت
واللي يقول عيب البكاء للرجال
مهوب صحيح
ايه أحبه
ايه أغليه

لدرجة اني بكتب فيه اشعار
وبردد الشعر اللي قالوه غيري
في الرحيل

سعد :

كتبنالك من الاشعار بدم مـن دمـوع العيـن
رسمنا لك على قلب ا لعناء صوره لاجل ذكراك

وهذي حيلة المشتاق الى طاول عليه البين
بذل جوده ومجهوده على شانك وشان رضاك

اعالج قلبي برجواك واكفكف دمعـة العينيـن
عليك اللوم عمري راح من همك ومن بلواك

سعد
والا تدري بسميك
باسمك اللي كنت تحب أناديك فيه
(سعد الـ فالح)
هو سؤال
ولم ولن أنتظر جوابة
ليش رحت
ليش رحلت
رحت عنا وحنا محتاجينك
رحت وقطعت قلوبنا عليك
لا تقول مستقبل
ماعليك قاصر
لا تقول طموح
كل شي متوفر
كذا تهون عليك العشرة
كذا بليلة ظلماء
نسيت وش سوينا لك
ياسعد
محد حط صورة ولده
في مجلسه الا انا
الناس تحط
صورها وبس بالمجلس
وانا حطيت صورتك
والحين ترحل

رحيل يعني في همومي أسافر

رحيل يعني شمس بتفارق الليل

كلي فراق وبعد والفقد كافر

الله يجعلها بدربك تساهيل

يا سعد خلها بكل المعاني
بالطيب بالمرجلة بالقبيلة
بالعشرة بالعلوم الطيب
لا تروح
اذا رحت
من بيفرحنا
من بيواسينا
حتى لو بتقول ماعاد عندي
شي أقدمه لكم
يكفي انك ولدنا
تربيت عندنا
وحنا نحبك
وانت تحبنا

ظنك الحب والغلا شي بسيط
ياخي الناس تدفع حياتها
حبا وتضحية في اللي تحب

ماهقيت ان الغلا يمحاه ماحي
لكن الايام ورتني العجايب
يومي يالاسود يبين من صباحي
والجفا معروف من طبع الحبايب

سعد أحبك
نعم أحبك

لو تطلب البحر.. في عينيك أسكبه
أو تطلب الشمس.. في كفيك أرميها
أنا أحبك… فوق الغيم أكتبها
وللعصافير والأشجار.. أحكيها
أنا أحبك… فوق الماء أنقشها
وللعناقيد.. والأقداح أسقيها
أنا أحبك… يا سيفا أسال دمي
يا قصة لست أدري ما أسميها

سعد خلها بعلوم العرب
وسلوم القبايل
طلبناك
نخيناك
لا تروح
وان رحت لا تطول ارجع

ارجع كما أنت.. صحوا كنت أم مطرا..
فما حياتي أنا إن لم تكن فيها

ووسأكتب لك

إرجع يا كل الحب إرجع يا روحي

إرجع أنا محتاج لأيامك الحلوة

مليت أنا مليت زادت جروحي

إرجع يا روح الروح الهجر ما يسوى

بس يبه الجو عندكم
ما أعجبني
عندكم شمس وحر في الصيف
وفي الشتاء عندكم برد يقص العظم
ابي جو يساعدني
على الدراسة
يبه حتى لون الأرض عندكم كئيب
غبار
وتراب
ابي اشوف الدنيا ابي اعيش جو مختلف يبه عمرك شفت بالرياض بحر؟
ابشوف البحر يبه
ابعيش
جو فيه زرقة البحر
لا تقول طول عمرنا عايشين
وجايزتن لنا العيشة فيذا
لا والله يبه التغيير حلو
طيب بتترك الثوب والشماغ
اللي طول عمرك ماتعرف الا هو
وبتلبس ملابس افرنجية
بنطلون وكرفته
يبه بتعود عليها
والكرفته يقولون فيه كرفته
جاهزة مثل حقت سواقين الليموزين
طيب انت ضامن لك قبول هناك
انت ضامن لك مقعد
يبه مو ضروري مقعد والا كرسي
انا مستعد ادرس لو واقف
اهم اطلع من جوكم التعبان
وانا من بيوديني للمستشفى
من بيدف الكرسي لي؟

وللي بخيصٍ فـي معـان القصايـد
لازم يعرف القصة اللـي لهـا روح

المشهد الأخير
في المطار:
تعلن الخطوط السعودية عن إقلاع رحلتها رقم 77 وعلى المسافرين التوجه لبوابة رقم 11

تنتقل الكاميرا لمنظر من غرفة العناية المركزة لرجل أبى إلا أن يحتضن صورة لابنه سعد وقد صورها بالثوب والشماغ

*

الأشعار
* الأمير عبدالعزيز بن سعود : ياطير
* حمد العلي : كتبنا لك
* أغنية لفهد بن سعيد : ماهقيت
* نزار قباني : ارجع
* أغنية لعبدالكريم عبدالقادر : ارجع
* صادّ : رحيل
==
القصة خيالية ولا علاقة لها بالرياضة

كشتــــــــــــة !!!

2012-01-21T21:43:00.000+03:00

لن تتغير ملامح المكان كثيرا
هكذا كنا نظن
التوسع العمراني طال أطراف الطريق الموصل للفيضة المقصودة
أما الفيضة نفسها فنظنها مازالت بعيدة كل البعد عن أي ملامح للعمران
ربما لبعدها عن الطريق الاسفلتي
وربما لوقوعها (ضمنا) ضمن نطاق محمية الحياة الفطرية
لا تهم التفاصيل والحيثيات
المهم أن المكان يجب أن يبقى كما هو
أو بالأصح من المفترض أنه
بقي كما هو
في هذه الأجواء الجميلة
كان الشاص

هو رفيق الرحلة وبرفقة الصديق الآخر (القارمن)

كل ما احتجته هو ادخال إحداثيات المكان
ثم الانطلاق بعد التسمية والذكر والورد
عشرون عاما منذ الزيارة الأولى وربما مرت سريعا
ولكن لا تزال تفاصيلها راسخة في ذهني
اقتراحات المكان تعددت
وكذلك مدة الرحلة
ما تم الاتفاق عليه حينها
أننا لازم (نكشت)
وكشتنا

كذا بديت أكتب قصة الوالد
ويوم قراها قال وش ذالمبالغة وأنا أبوك
القصة أسهل من كذا
كنا قبل عشرين سنة سبعة شباب
كشتنا لفيضة في الصمان

وهالحين اشتقت أروح لنفس المكان
وكان ودي تصير كشتة بنفس رفقاء الكشتة

بس ماكتب الله نجتمع مرة ثانية وعشان كذا بكشت
وبلحالي وبس وان كانك بتخاويني فحياك الله
بس طال عمرك (ميد الوالد) لازم نسوي أكشن
رد الوالد بروحه المرحة:
أكشن وإلا ام بي سي فور
ابتسمت بتثاقل وقلت : ملعوبة
تدري وانا ابوك (ميدي)
ان الستة اللي كشتوا معي
لو تشوفهم الحين ماصدقت
انهم كانوا أصدقاء وربع قبل عشرين سنة
من جد؟
من جد
شوقتني يبه أعرف سواليفهم
تركى الوالد ومد لي الفنجال
صب لي وأنا أعلمك
أول واحد

(1)

الهامور

لم يكن مستثمرا
ولم يكن مضاربا
الشاشة متعة ضمن متعه الكثيرة
كان يعشق تكسير العظام لمن يتحداه في سهم ما
عندها لايهم كم سيخسر
ولا كم سيربح
لذا لا أحد ينافسه
سلاحه ( الرش)
يساعده في ذلك سيولة
من رآه يستخدمها ظن أنها لن تنتهي
عندما ينشن على سهم
فقراره هو الأول والأخير
إن صعوداً أو نزولا
يثق ثقة غريبه بأسهمه
ولا يترك المجال لأي ظن
أو هاجس بأن يغير توقعاته
عندما يرفع سهما لا يقنعه
إلا النسبة
وعندمايخفض سهما
لا يقنعه أيضا سوى النسبة
كأن أسهمه تترنم قائلة
لنا الصدر دون العالمين أو القبر
هكذا كان تعامله
وهكذا كانت ثقته
وهكذا كانت سيولته
يتعامل معها وكأنها معادلة
وأي معادلة
إنها معادلة بلا مجاهيل
فالكل معلوم
والأرقام من وجهة نظرة
لا تكذب ولا تتجمل
طرح يوما ما سؤالا
بجائزة ثمينة
على رواد مجلسه من المتداولين
أبي أفضل لقب
يمكن أن تصفوني به
وجاءت الألقاب تتسارع
متخذة جلباب التفخيم تارة
وسالكة دروب التعظيم تارة أخرى
في طرف المجلس
كان أحدهم يمارس هوايته
الصمت عدا أصوات احتكاك خرزات مسبحته

التي بالكاد تتحرك بفعل ضغط أصابعه الشديد عليها
شبهها بأسهمه الواقفة والفرق بينهما

أن خرزات سبحته تتجاوب مع ظغط أصابعه
بعكس أسهمه التي لايستطيع
أقوى ضغط أن يزحزها
عدا ضغط الهامور طبعا
جاءه السؤال مفاجئا أوقف على أثره حركات أصابعه
طالبا منه لقبا أو صفة أو تشبيها للهامور
سيد الجلسة
عندها لم يسمع الجميع سوى صوته وهو يقول
مافيه طال عمرك لقب إلا المصعد
بضغطة زر ترفع السهم اللي تبي
وبضغطة ثانية تخفس بالسهم اللي تبي
بس ياليت نقدر نركب لو مرة نبي نترك هالقبو اللي لنا سنين ما تعديناه
عز الله انك جبتها
المصعد
ينادي الهامور سكرتيره
رح جب عشرة الاف
يجيبها ويناولها للرجل صاحب فكرة اللقب
اثرك تعرف الكاش وماتعلمنا
طيب ورا ما تعرفني عليه
ههههههههههههههه
أطلق الوالد ضحكته المجلجلة
ليتبعها بقوله : فال الله ولا فالك
ليش عسى ماشر وش فيه الهامور
: ملحط بسجن الملز
مديون بعشرة ملايين !!!
طيب والثاني يبه
اسمع

(2)
رايح فيها

كذا كنا نسميه أو كذا كنا نعيره
ماتفارق الزقارة يده

ويقولون ( قالها وهو ينفض ثوبه) براي لله
انه راعي قضوم
افا والله وطلعت يبه تعرف ناس راعين كيف
اي كيف واي خرطي
الرجال كان ما يدري وين الله حاطه فيه
من زقارة لزقارة
وعجز ياخذ الثانوية
ومن عقب ذيك الكشتة
معاد شفته
الين قبل كم شهر كنت أدوج بين هالمحطات الفضائية
لقيته في برنامج بتاع كله
مفسر احلام وراعي خلطات ولهوم
شي للتخسيس وشي للتسمين وشي لضيقة الصدر وشي للي يبي عيال
وش ذا من راعي كاش لراعي لهوم
وش نسوي وانا ابوك
بس فاقدة لي اسبوعين
ويوم سألت عنه قالوا ملحط بالسجن في قضية خلوة
وش ذا كل ربعك ملحطين؟
أجل لو تسمع الثالث
وشو بعد

(3)
الدباب

وش ذا بعد

هذا كان وانا ابوك الطارة حقنا
كان ما يجي احد مثله بالسواقة
ولا بالتطعيس
كان معه ددسن ما ودك الا تناظره
جنوط وخطوط ومطيح الصندوق وصدامات نيكل وخر عنه

وليش مسمينه الدباب يبه ؟
هذا في جلساتنا يقلد الأصوات
وكان يضبط صوت الدباب

بشكل رهيب
لدرجة انه ما يجلس بمجلس

الا ويطلبون منه تكفى الدباب

الين لصقت فيه هالعيارة
طيب والحين وينه لا تقول لي ملحط
وش دراك؟
له خمس طعش سنه ملحط بالحاير

صادمن له اربعة وهو يفحط

ثلاثة تنازلوا والرابع جندي الدورية

عنده عيال توهم مابلغوا
والرابع ؟
الرابع هذا الله يسلمك كنا نعيره
كابتشينو

(4)

كابتشينو

شكله ولد نعمه
لا والله
الا ذيك الايام كشتنا وجاب لنا زمزمية

فيها حليب مخلوط بقهوة

وقال هذي شي جديد

وتوهم مخترعينه واسمه كابتشينو
ومسكناها عليه
وصارت عيارته : كابتشينو
ووش قصته ؟
هذا كان شريطي سيارات
يبيع ويشتري فيها
وما عمره باع سيارة

الا وهو رابحن له اقل شي اربعة الاف
وشلون؟
بالحلوف والنصب
ومرت الايام وصار له قصة عجيبة
فتح له مؤسسة وصار يمسك مناقصات
وتطورت تجارته
شكله هو الوحيد اللي ما تلحط
لا الا نقدر نقول هو الوحيد اللي انفضح
وشلون؟
قبل ثلاث سنين حطوا صورته بالجريده
ممسوك عارض رشوة بمليونين على لجنة
مناقصات
ياليتك يبه ما طرت على بالك هالكشتة
الله لايعيدها كبت عشاك
وطلعت سوالف الجريات كلها
بقى اثنين
الخامس سالفته سالفة
هذا الله يسلمك راعي الطرب خوينا
اللي ماسك كل جلسات الكشتة
يخرش العود خرش
وش اسمه بالله يبه
هذا الله يصلحك مسمينه صعب

(5)
صعب

صعب؟
ايه صعب
ووش سالفة صعب؟
كنا كل ما طلبنا منه لحن يغنيه قال : صعب
اجل وش يغني لكم؟
اكثر شي يغني :
ياناس حبيت واحد
واثر المحبة صعيبة
اثر المحبة تبكي
والقلب لازم تجيبه
والا اغنية
خلاص من حبكم يازين عزلنا
ماعاد لي في هواكم شف أو راده

أما الاغنية اللي يضبطها فهي :
خلصت من جملة الخلان احسن لي اعيش وحداني
ماعاد اعاشر جميع انسان يكفي العذاب اللذي جاني
طيب ورا ما تعزمه ويغني لنا شوي
وين اعزمه الله يصلحك
محكوم عليه بعشرين سنة
ليش ؟
مهرب حشيش

ما بقى الا السادس

(6)

بربيكان

وسالفة الاسم اتوقع واضحة
هو اللي طيحنا ببربيكان
كنا ما نعرف الا موسي
واذا رحنا لمصر ستيلا
ويوم كشتنا مرة
جاب لنا بربيكان

ومدحها وفعلا جازت لنا
خصوصا بربيكان بالتوت
ومن عقبها سميناه بربيكان
أكيد ملحط مثل ربعه
برافوا عليك
هذا كان لعيب كورة ويفت كورة
وشوي وياصل للمنتخب
بس الدنيا الله يكفينا شرها ما تخلي أحد
كيف ؟
تعرف له على بنات
وصار راعي سهر
وفجاه قالوا لنا ممسوك
وش قضيته؟
مهدد وحدة بصور لها
ومسكوه بقضية ابتزاز
وكم حكموا عليه
والله مدري عنه
بس يوم فتشوا لابتوبه

لقوه مهكر حسابات ناس في بنوك
وشاطفن له ملايين
وهانت عندها قضية الابتزاز

يعني مافي هالسبعة ما تلحط الا انت
يعني سبعة شباب كشتوا وتلحطوا
كلهم الا انت

هنا انتهى الطريق الاسفلتي

في طريقهم للفيضة ليؤشر الاب لولده
رح يمين؟
وين يمين
ماتشوف الشبك

يسار؟
شبك
اجل مالنا الا نرجع للبيت الظاهر الفيضة ما كتب الله لنا نشوفها مرتن ثانية
شف شف يبه
وش ؟
فيه فتحة بعييييييدة بالشبك
ظنك الشاص يخش ؟
نحاول
وما امداني اقرب من الشبك
الا والدورية الصدام بالصدام

سلم نفسك المكان محاصر

افا يبه حتى أنت بتتلحط
وش زودي
بس ودي ادري وش قضيتك
ما تشوفنا بغينا نخش في الفيضة
الا وش فيها
الفيضة بالصمان والصمان بالسعودية

وحنا سعوديين

لا وانا ابوك
كيف؟
أنا طرش بحر !!!

المشهد الأخير
من خلف الشبك
فيضة جميلة مربعة

وش كبرها ما فيها الا راعي جمس كاشت هو وعياله
ووحدة من بناته معها كاميرا تصور جمسهم !!!

*** أي تشابه مع أسماء ويوزرات حقيقية فهو بمحض الصدفة

* الصور تعبيرية وليست حقيقية

سلطان تبكيك القصايد والأشعار

2012-01-21T21:13:00.000+03:00

سلطان تبكيك القصايد والأشعار

وتبكي على فرقاك كل المدينة

ماني مصدق يوم ذاعوا بالاخبار

قمت أتلفت صدق ؟ سلطان وينه ؟

المملكة تبكي فراق ابنها البار

يبكيه كل الشعب ربي يعينه

سلطان عم الحزن في كل الاقطار

الكون مظلم والأماكن حزينة

مالوم من يبكيك يا مكرم الجار

والله فراقك صعب والله غبينه

ندعي لك الرحمن للذنب غفار

ينزل عليك المغفرة والسكينة

مني العزا ياصل طويلين الاعمار

اللي على الأوطان أيدي أمينة

سلطان تبكيك القصايد والاشعار

الكون مظلم والأماكن حزينة

خشم البندق !!!

2012-01-21T21:09:00.000+03:00

هالموضوع اكتبه وانا بعيد عن اللابتوب
وبعيد عن النت
ماحبيت يصير في صدري كلام ما اكتبه
وبالفعل ما قصر الايفون فزع معي الين كتبت
ونشرت هالكلام
وادري التنسيق مو لذيك الدرجة
بس العذر والسموحة منكم
======
خشم البندق

المكان الولايات المتحدة الأمريكية
هالقصة عن دكتور عيون بارع
اسمه خالد رايح في الإجازة يزور بنته اللي تدرس بأمريكا
واللي اسمها مشاعل
المهم ما أطول عليكم
كان الدكتور خالد جالس في صالة الشقة اللي ساكنة فيها بنته
وكان ممسكا بايباد 2
وشابك السماعات باذنه
وقاعد يتفرج على مسلسل
أم الحالة
دخلت عليه بنته
-- صبحك الله بالخيربابا

اي صباح تونا بالليل

وبعدين ما امداك تنومين عقب التراويح الا وانتي قايمة !!!

-- أحد عنده ابوه في الغربة ويضيع الوقت في النوم !!!
-- ماشاء الله وش هالبر اللي جاك بأمريكا ؟ !!
-- وانت وش هالنشاط اللي جاك بأمريكا !! شكلك ماتنوم ابد
وقاعد تتفرج على مسلسل !!
- ايه هذا مسلسل أم الحالة
شوفي هالمقلع عزيز

وربي لو اني ما قريت اسمه كان اقول مقطوعن سره ببريده
ماشاء الله عليهم حقين هالمسلسل مبدعين
وباذلين جهودهم صح وما حطوا هدف قدام عيونهم غير الإبداع
وتبين الجد ما أعجبني الا هالمسلسل
لا طاش ولا قول في الثمانيات ولا حتى الفلتة اللي كنت متوقع طارق العلي بيبدع فيه
بس ماش طلع تهريج
وغشمشم ؟
هالسنة لابسن ثوب مهوب ثوبه

يعني مابقى الا ام الحالة
بالظبط
-- الله يوفقهم وكل الشباب
السعودي
-- ذكرتني ؟
-- وش ؟
-- دكتورة عندنا بالجامعة طالبة من كل الطلاب والطالبات الحديث عن شيء يخص بلد كل واحد
وانتي وش بتتكلمين عنه
بيني وبينك للآن ما جزمت
وكم المدة ؟
ما تتجاوز عشر دقايق
يقوم الدكتور خالد من مكانه
متجها لغرفة النوم
وين وراك سفهتني وقمت
اصبري بتشوفين
ثواني ويدخل حاملا شماغا بكلتا
يديه ومقلدا الرياضيين في تسليم علم الدورات الرياضية
وش ذا ؟ وش اسوي به
هذا اللي بتتكلمين عنه
الشماغ!!!

ايه الشماغ
وش بقول غير انه يلبس فوق الراس
اووووووه بتحتارين وش تختارين وش تخلين
ما اتوقع
ليه
ماعمري حسيت انه شي يستحق الحديث عنه اكثر من جملة او جملتين
يضع الدكتور الايباد جانبا ويعدل من جلسته ليصبح متربعا
وش دراتس
عذا الشماغ كان له صولات وجولات
كان يعتبر شيئا هاما قديما
كان على وقت ابوي الله يرحمه اللي يتاخر في الصلاة ياخذون شماغه
علشان يتفشل ويحافظ على الصلاة
ولذلك تلقيني ما اقدر اطلع من البيت في الرياض بدون شماغ
تنظر مشاعل لصلعة والدها

وهي تقول الله لا يلومك تراها مغطية بلاوي
لا مو عشان كذا - جادا - يحدثها وهو يمسح صلعته بيده اليمنى
هي عادات نشانا عليها
من وحنا صغار
طيب وش بعد ؟
هالشماغ في الشتاء يدفي
وفي الصيف يقي من الشمس
وبعد الوضوء فوطة
وعند الزواج والمناسبات شخصية وسكبة
اذكر مرة واحد اندعس ومات الله يرحمه وغطوه بشماغه الين جاهم الاسعاف
تدرين ؟
وش ؟
مر علينا فترة كان شراء الشماغ يحتاج لجهد
كيف
كان محتكر واللي يبيعه معطش السوق
فنضطر نمسك سرا من عقب صلاة الفجر حتى ننال شماغا واحدا
للدرجة ذي ؟
ايه واتذكر كان الشماغ هو رفيقنا في اول يوم دراسي
تلفه الوالده الله يرحمها
لسببين
الاول اتقاء البرد
والثاني تحفيزا للنا واعلاما بدخولنا مرحلة الرجولة - هكذا افهمونا وهكذا اختصروا سنين كثيرة من طفولتنا بثمن بخس شماغ مهتريء
لا وازيدك من الشعر بيت
كان عنصر اساسي في العابنا
كيف؟
مرة سلاحا للضرب
ومرة اداة لتغميض العيون

ومرة اداة شيء يخبا ثم يعثر عليه الفطن منا
وهكذا
نشانا ونشا الشماغ رفيقا وصديقا ومساعدا
لذلك لا اتصور ان استغني عنه يوما
ومادمنا نتكلم عن الشماغ عندي لك قصة اول مرة اقولها
ويمكن تتعجبين منها
تخصك ؟
ايه تخصني
يالله كلي اذان صاغية
مو قبل ما تصلحين لي شاهي من اللي انتي خابره
ابشر وعندك واحد شاي وصلحووووه للدكتور خالد
تقولها وهي تتجه للمطبخ
تسرع في عمل الشاي وتاتي به
وهذا الشاهي يالله وش هالقصة
هذي الله يسلمك قصتي مع واحد
لازلت اذكر اسمه للحين
لا والاسم الثلاثي بعد
لا لشيء فقط لان اسمه غريب شوي
كان اسمه سالم محمد خشم البندق
وخشم البندق هو اسم عايلته
وبعضهم غيره فصار ال خشم
والبعض الاخر صار ال بندق
وبعضم لم يغير فهو من ال خشم البندق
وربما كان لاصل التسمية علاقة بممارسات قديمة
او لفظ او هرجة درجت على لسانهم
المهم ان سالم ذا
ودي ذاك الوقت الا معي كميرا
اصور لك ثيابه وشماغه
اللي صايرات خرايط من الوصخ
ومع ذلك مستلمني في الرايح والجاي
لا تلبس شماغ
الشماغ مو لاشكالك
انت ما لبست الشماغ الا علشان تغطي هالفليفلات
ومن هالكلام
طيب ليش بابا مستغرب هالشي
والله مدري
بس ربما غيرة من تفوقي
او ربما محاولة اغاظتي
وعندما كان الحديث عني بين شباب ذلك الوقت
كان سالم يقول
وش فيه زود يلبس شماغ مثلنا
يحمد ربه اللي خليناه يلبس شماغ مثلنا
للدرجة ذي
واكثر
كيف
كان ينتظر حصة التربية الرياضية
وكنا انذاك نضع ملابسنا على طاولات الدراسة
ونذهب لنلعب بالكرة
واتفاجا حينها بغياب شماغي
اول مرة بكيت وذهبت للمدير اللي امر الفراش بالبحث عن شماغي
ومالقيناه
قال لي المدير اجلس
وقال للفراش رح جب شنطته
وعطانياها وهمس في اذن الفراش
خرجت معه ولم يذهب بي للبيت

بل للسوق ليشتري لي شماغا جديدا وعلى حساب المدير
ومن وقتها
كرهت الرياضة
وكرهت كرة القدم

اللي بغت تصير سببا لفقد شيء كان وما زال يمثل لي شيئا ثمينا
الكورة
اللي صارت واصبحت غاية وليست وسيلة
ودخل فيها ناس ماهمهم الا الدسائس والمؤامرات
طيب وش صار
نسيت الموضوع
وصار الشماغ فخر لي
وخصوصا انه جاء هدية من المدير
مكافاة على تفوقي وبروزي على مستوى المدرسة والديرة كلها
وش صار بعدين
ابد مرت السنين وانا ابوتس
الين قبل كم شهر
كنت اطالع اسماء المرضى المحولين لعيادتي في المستشفى
وكان من بينها اسم مانسيته ابد
سالم محمد خشم البندق
وكشفت عليه ؟
ايه ؟
وش قلت له ؟
اول ما دخل سلم ورديت السلام
ولما اشتكى من عيونه
جلست على الكرسي للكشف على عيونه
وقربت منه وما قلت له الا جملة وحدة بس
وش ؟
افصخ شماغك عشان اكشف عليك !!!

تمت

سقط سهوا !!!

2012-01-21T20:55:00.001+03:00

سقط سهوا !!!

كان الخلاف يحتدم كثيرا

هل هي بالسين

أم بالصاد

فريق يقول بالسين

والآخر بالصاد

وفي الأخير النتيجة واحدة

عدم الانتقال من الصف الدراسي

الحالي للصف الدراسي التالي

يعني ساقط

كانت هذه الكلمة هي الأسوأ

وهي بداية سيل جارف من أنواع العقاب

لذا لم أر أحدا يحبها أبدا

منذ الصغر رأيناها على الجدران

يسقط النصر

يسقط الهلال

وكأنهم يخوضون امتحانا نهائيا

ليأتي المنافسون فيغيروا الجملة

لتصبح :

يعيش الهلال

يعيش النصر

وبالتأكيد لم ولن يسقطوا

وإنما عاشوا

عاشوا

وكأننا في حضرة فرقة ما

تتردد الكلمات

عاشوا عاشوا

ومادمنا نتحدث عن الكرة والرياضة

فالسقوط داخل منطقة الجزاء

يعطي ضربة جزاء

وربما جاء السقوط تمثيلا

ليجني على صاحبه

بدلا من ضربة جزاء

يعطيه الحكم كرتا أصفر

وربما جاءت لمرة نادرة دلالة على التفوق

عندما يقال لسائق السيارة : اسقط عليه

عندها لابد من السقوط لنيل النجاح

وبالتالي التقدم والفرح

مدرس اللغة العربية يستخدمها كمثال

لبداية الجملة الفعلية

متبعا إياها بالمطر

لتصبح الجملة يسقط المطر في الشتاء

ومادام الحديث حول السقوط

لا أنسى ذلك العام

كنت في أواخر المرحلة الابتدائية

كانت النتائج تعلق على جدران المدرسة

قائمة الناجحين

عندها لامجال

للاختباء ولا مجال للكذب

الجميع يقرأ

والأصابع تتابع الأسماء

وتنتقل من سطر لسطر

تماما كما كنا نفعل في درس المطالعة

وهكذا كان اسمه قبل أن يتحول لاسمه الجديد : القراءة

الأسماء موجودة

الناجحون

ومن لم يجد اسمه

فحتما هو من الساقطين

ومن بعيد

يلمح الجميع دخول

عدد من الرجال

لغرفة المدير

لم يكونوا مدرسين

ولم يكونوا من أولياء الأمور

يقسم أحد الأصدقاء

أن أحدهم يلبس بشتا

تتعالى الأصوات

وتتعلق الأنظار

ويطول الانتظار

لا عن شيء سوى

لمعرفة سبب هذه الجلبة

وداعي ارتفاع الأصوات

تتسارع ضربات قلوبنا

جمع غفير من الطلاب وأولياء أمورهم

كانوا سيقرأون الأسماء

ثم ينصرفوا

إثارة الموقف وتعالي الأصوات

جعلهم يتأخرون

ينتظرون

الفضول يكاد يقتلهم

الجميع عرف نتيجته

فإما آمال بهدية ثمينة

ربما كانت سيكلا او كرة قدم جلدية

او ريالات بسيطة

أو دموع تمسح بطرف كم بالي

وفي كلا الحالتين كان الترقب سيد الموقف

ليهدأ الصوت ثم ينخفض

وبعدها يسود الصمت

ليخرج المدير وبيده ورقة واحدها

ألصقها بجوار أسماء الناجحين

كتب فيها اسما لطالب واحد فقط

تأكد الجميع أنه بالفعل ساقط في نتيجته ولم ينجح بعكس ما يراد له وبه

واستخدموا ثقافتهم وما تعلموه فعلا

حينما قرأوا جملة واحدة دونت فوق الاسم الوحيد

كانت الجملة :

سقط سهوا !!!

متـــــفائل !!!

2012-01-21T14:06:00.001+03:00

العيد عندي ثوب وشماغ وعقال

والعيد عند الناس موعد للأفراح

مغير أشوف العيد بعيون الأطفال

وبعيوني الدمعات والشوق ذباح

ايه اشتكي وأبكي ولو كنت رجال

الضيق خيم في دروبي ولا راح

الحزن في صحراء حياتي له جبال

ماهزته مثلي عواصف ولا رياح

بس أنتظر كلي طموحات وآمال

القلب أرض وبسمة العيد فلاح

ياعيد متفائل على كل الأحوال

مهما يطول الهم لا بد ينزاح

النهاية !!!

2012-01-21T13:54:00.000+03:00

ملاحظة مهمة جداً : كل ماكتب هنا لايمت للخيال بصلة . . .

كتبت لها
جمعت كل أحرفي
واستدعيت كل قواي الشعرية
لأكتب مايليق بها ولها
هي حقيقة تحولت لخيال
وهي خيال تحول لحقيقة
تماما كما يقول نزار
وإذا قال نزار فصدقوه
فإن ( الحب) ماقال نزار
يقول :
الحب في الأرض . بعض من تخيلنا
لو لم نجده عليها .... لاخترعناه

ماذا أقول له لو جاء يسألني
إن كنت أهواه... إني ألف أهواه..

نعم إذا هو خيال بل واختراع ؟؟
لا أتوقعه صادقا البتة هنا
والدليل بيته اللاحق
إني ألف أهواه
وهذه المفردة تحلق بي لعبدالحليم وهو يصدح برائعته :
أهواك وأتمنى لو أنساك
وانسى روحي واياك
إذا لامناص منه نبرر بأنه خيال
وربما قلنا أوهام
وربما وصفناه بأحاديث الشعراء الكاذبة
وحين تحاصرنا الدلائل نلجأ للستعانة بصديق
ونتهمه بمشاعر هو طلب صياغتها شعرا
وأنى له ذلك ؟ وهو بالكاد يتهجأ حروف العشق الأولى ؟؟ !!!
وعندما تكتب بكل شفافية وتحاول أن تنفس قليلا عن مشاعر الشوق والوله
تحاصرك الأسئلة وتختطفك لعوالم من العتب حينا
والخصام حينا
وربما تحولت لشيء من البغض لك ولها
ويأتي السؤال الأول : وش معنى هديل؟
والمعنى هنا في ( حرف الشاعر)
يتحول المعنى لمعنا
ويأتي الجواب من صاد ّ شعرا كتبه بحروف من الصمت ود لو تحولت صراخا تسمعه كل الدنيا
صراخا تمنى لو سمعه ملحنا ومنغما ليستمعه في رحلته الدائمة نحو الصمت
كاسرا به جدار الخجل ولأول مرة
ليغني بكل لغات الدنيا :

هديل يعني شعر يعني دواوين
هديل يعني للحنين البداية

هديل يعني شي فوق الموازين
يعني حكاية حب وأحلى حكاية

هدين للقلب المعنى شرايين
هديل نبع الحب يروي ظماية

هديل يعني شين والميم والسين
من دونها وشلون تشرق سماية؟

يعني نموذج حي للملح والزين
يعني وسيلة صارت اليوم غاية

هديل يعني من بنات السلاطين
يعني هديل تصير للزين آية

يعني أناقة لبس وأحلى فساتين
يعني ستر يعني جمال العباية

يعني فرح يعني ورود البساتين
يعني سهر كمّل عذوبة مسايه

يعني نغم من دون نوتة وتلحين
يعني أدب يكتب فصول الرواية

يعني أمل يختال في مقلة العين
يعني غرام وحب يعني غواية

هديل تاخذني لدرب المجانين
جنون وآخرته بغرفة عناية

واطيب لاقالوا ترى اليوم بتبين
يعني هديل بجد صارت دواية

هديل فلم القلب واخراج (شاهين)
واكتب على الشاشة هديل : النهاية

الكنز : فصول من سيرة خلف

2012-01-21T13:29:00.007+03:00

يرن جوال صادّ

على الطرف الآخر تركي صديقه

- وش أبشرك يا صادّ ؟

- خير إن شاء الله

- لقيت لك كنز والتفاصيل بعدين – فاضي اليوم العصر؟

- فاضي ونص

- ماتخلي هالنص عنك ياصاد ؟ عموما بمرك العصر والتتفاصيل إذا جيتك

عقارب الساعة بالكاد تتحرك

انتظارا للعصر

وترقبا للكنز

هنا بدأت الأفكار تجي وتروح

أول شي بحول كم ألف لبعض الناس علشان الاعتزال

يمكن تصير الحسابات صح ويطلع مردود الاعتزال اكثر من مصاريفه !!!

وبشتري شاص جديد 2011

وبشترك في العضوية الذهبية ثلاث سنوات

وإذا كان الكنز أكبر من كذا وبقى شي منه

بفكر أفتح مركز تدريب لـ (بعض) الإعلاميين

يركز هالمعهد على أساسيات التعامل مع المتلقي

سواء كان قارئا أو مستمعا أو مشاهدا

الدخول في معمعة الحسابات والتفكير في المال أشغلني ربما عن تناول وجبة الغداء

انتظارا لتركي

دقة وتسكيرة كانت العلامة لتركي لأخرج له

- اركب اركب

- وين ؟

- اركب بعلمك في الطريق

سلك الدائري الجنوبي باتجاه حراج (بن قاسم)

وبعد أن تجاوز الحراج سلك طريق أعلى النفق

ليتجه يسارا

وعند اشارة مدرسة أبي عبيدة عامر بن الجراح اتجه يمينا

ثم اتجه يمينا بعد كم شارع تعداها

عند دخولي للحارة (منفوحة) لم أتفاجأ بنوعية العابرين

ولا بنوعية السكان

( كل هذا وتركي رافض يقولي وش السالفة أو حتى وش هالكنز)

وبيني وبينكم تخيلته مودينا لواحدن من بيوت هالطين المتناثرة يمنة ويسرة

لينبش كنزا مدفونا علم به من وصية لوالده أو جدة

وتحقق جزء كبير من المفاجأة حين أوقف سيارته بجوار بيت طيني متهالك

تطل من أعلاه بقايا أخشاب متهالكة أيضا تشكل سقفا رديئا لعشة حمام

- انزل

- نزلت وانا اتوقع يفتح الشنطة ويطلع مسحاة وكريك وعدة الحفر

طرقات خفيفة على الباب الحديدي المهتريء

ليفتح الباب ( شايب) تجاوز الستين

بشرته السمراء وطوله الفارع هي ماتميزه

- يا هلا تفضلوا

دخلنا للبيت يسبقنا (الشايب ) بخطوات متلاحقة ومتسارعة

انعطف يمينا لأفاجأ بدرج يتجه للسطح

همست في تركي وين بيودينا ؟

- امش ماعليك

- مشيت وأنا أقول في نفسي : (أول مرة أشوف كنز مدفون في سطح ) !!!

كان الطقس في الرياض على نهاية الصيف وبداية بعض النسمات الباردة

وما أرق الرياض في الشتاء !!

- يوم طلعنا للسطح لقينا سجادة مفروشة وضعت أمام عشة الحمام بالضبط

وفي زاوية السطح اليمنى (دافور )

وعليه ابريق شاهي أحمر

كلمات الترحيب الصادرة من فم الرجل استنتجت منها ماض أصيل

ربما اقتبسها من خلال عمله في أحد القصور أو مرافقته لتاجر كريم

انتهى من الشاهي وجابه لنا في صينية من الستالنس ستيل

وضع فيها ثلاث بيالات وأمسك البريق ببيز مطرز تطريزا فاخرا

- أعرفك على خلف

- ياهلا والله وسهلا

- حديث جانبي بين تركي وخلف حول الحمام

- يلتفت لي تركي وهو يقول :

- تفضل ياصاد هذا هو الكنز (خلف )

- والنعم والله

- يمكن تقول وش الكنز ؟ ترى معرفة الرجال كنوز ياصادّ

- فعلا والله انك يا خلف كنز

- ماعليك زود طال عمرك

من هنا بدأت علاقتي بخلف أو الكنز على قولة تركي

بدأت أشاركه في شاي العصر لفترة طويلة اكتشفت فيها فعلا أنه كنز

- خلف متقاعد من عمله كمراسل في مدرسة ليست بعيدة

فهي في أطراف الحي

- تزوج لمرة واحدة ولم يكتب لزواجه النجاح ولم يرزقه الله الذرية

- يعتمد كثيرا على راتبه التقاعدي في معيشته

- يجيد كتابة الشعر ويتابع كثير من الشعراء

- كان مشجعا ومتابعا للكورة ولكنه حاليا يتابع بشكل متقطع

- سألته عن الكورة

- شف الكورة على قولة يوسف الثنيان (كيف الحال)

- وشلون؟

- من اعتزل الثنيان وماجد والكورة منسمة

جاء والد خلف للرياض وعمل حارسا في المدرسة القريبة

يخافه حتى المدرسون بعد تقدمه في العمر مرض لفترة طويلة

اقترح بعض المعلمين على ابو خلف :

ورى ما تخلي خلف يشتغل بدالك الين تطيب بدال مطامره في سوق الحمام

في البداية لم ترق الفكرة لخلف

ولكنه أمام الحاح والده رضي بالمهمة بل وأبلى فيها بلاء حسنا

مما استدعى المدير أن يقترح عليه وظيفة أخرى كمراسل براتب إضافي

خصوصا وأنه يحمل الكفاءة

استمر خلف في الوظيفتين حتى بعد وفاة والده

ولكن الراتبين لم يستمرا حيث انقطع راتب والده بعد وفاته

وحتى نصيبه من التقاعد حجب بحجة عدم وجود وريث تنطبق عليه الشروط

علاقته بالحمام بدأت مبكرة

منذ دندناته بقصائد مشهورة أنذاك :

ياحمام على الغابة ينوححمام جانا مسيان ولا سلم عليه

تصدق – (يخاطبني)

- وش؟

- أول ماحطيت عشة الحمام كنت إذا رقيت للسطح أطمن مابي أحد يشوفني من الجيران

- وما كنت أحوم الحمام مغير صاكن عليه بذا العشة

- والله يكثر من باقي الغداء والعشاء

- كنت ما أبيع منه إلا إذا طفرت وذيك الساعة أطمر لسوق الحمام

وأبيع جوز وإلا جوزين تفك أزمة

واستمريت مع الحمام اللي صار لي عشق حتى عقب ماتقاعدت

صارت جلستي فيذا قدام هالعشة وياسلام على صوت الحمام

والا منظره وهو يطير من صندوق لصندوق

طيب يا خلف ليش ماتحوم الحمام؟

ومن قال لك اني ما أحوم الحمام بس طال عمرك مهوب كل حمام يستاهل التحويم

- وشلون ؟

- عندك القطيفي لو ما تحومه يموت في العشة من ضيقة الصدر

- فقيت اثمي : من جد يموت ؟

- مايموت يموت بس كذا تحسه ضايقن صدره

- وعشان كذا تلقاه يتقلب في العشة

- وأول ماكنت أحوم الحمام أبد بس يوم راحوا السعوديين من الحارة

- بديت أحوم القطيفي والقطيفي بس

- عشانه يتقلب ؟

- أكيد تصدق بعضها تعد له عشرين قلبه وبعضه أكثر ويعضه أقل

- طيب ماقد ضاع لك فرخ؟

- لا الفروخ منيب أطالعها ولا تهمني

- أجل؟

- أنا أموت في الحمام خصوصا (الغرانيق)

- وشي الغرانيق ؟

- حنا نسمي الحمام الأبيض : غرنوق

- طيب ماقد ضاع لك حمامة ؟

- إلا والله وياهي كسرت قلبي

- أذكرها قبل كم سنة شفتها أول مافقست

- من صغرها وأنا أقول ذي بيطلع منها شي

- وراحت الأيام وأنا أطالعها واراقبها وبيني وبينك دخلت قلبي

- لا جنحان ولا منقار ولا عيون

- اسلم

- الين جاء ذاك اليوم اللي قعدت أحوم الحمام القطيفي

قلت يا ولد طلعها معه خلها تطير وتوسع صدري وصدرها

- وطلعتها ؟

- وياليتني ماطلعتها

- ليش؟ عسى ماشر ؟

- طلعت وهي الطلعة , كل الحمام رجع إلا هي , وبيني وبينك مانمت ذاك اليوم

- مغير أطالع في السماء وأنا مولع لمبة السطح قلت يمكن تجي

- وجت؟

- لا ماجت , ومن عقبها بطلت أحوم الحمام مغير صاكن عليه في الشبك

- حتى القطيفي؟

- حتى القطيفي هو السبب لولاه ما ضاعت حمامتي

صليت معه المغرب في المسجد ووراني عمود ما يجلس إلا عنده

ماشاء الله عليه خلف يتوضأ قبل الأذان

ويتطيب ويروح للمسجد وركعتين تحية المسجد همن ياخذ مصحفه ويقرأ القرآن

- الا يا خلف ورى ما تصير مذن؟

- منيب مطوع

- بس انت متدين وما فرقت عن المطوع بشي

- ادع لي ان الله يهديني

- الله يهديك بس والله ماشفت منك ولا عندك إلا كل خير يعني علشان اللحية ؟

- حاول خلف تصريف الموضوع ليسألني :

- بتجي بكرة ؟

- بحاول بس ترى بكره بنقلبها قصيد وش رايك ؟

- موافق

في نبرات صوته بقايا حزن قديم لم أستطع الوصول لخفاياه – أي الحزن –

أسمعني بصوته الجميل رائعة محسن الهزاني :

برقٍ تلالا .. قلت عز الجلالا

وأثره جبين صويحبي .. واحسبه برق

قالوا كذا مبسم هيا .. قلت لا لا

بين البروق وبين مبسم هيا .. فرق

مبسم هيا .. له بالظلام اشتعالا

بين البروق .. وبين مبسم هيا فرق

حاول مداراة دمعة تكاد تنزل من عينه وهو يناولني بيالة الشاهي

حينما بادرني :

- سمعنا ياصاد ّ من قصيدك

- أبشر والله

- هذي أبيات قلتها البارح وما بعد نشرتها أبد :

قالت : ممل وقلت : انتي مملة

وقتي معك يابنت صار أغلبه صمت

لا تزعجيني بالعتب والأدلة

أنا أفتخر: يكفي عن العايبة شمت

وش فايدة فنجال من دون دلة

كلي ظما – مع ذاك – فالقايلة صمت

درب الفراق بجد قلبي يدله

كانك سهر ؟ بدري أنا البارحة نمت

- صح لسانك

- صح بدنك

المشهد الأخير :

نهاري خارجي: عشة حمام مفتواحة الباب

وأمامها جثة لرجل يرتدي ثوبا أبيضا ناصعاً

وفي السماء تطير أسراب من الحمام !!!

(الجاثوم)

2012-01-21T13:26:00.004+03:00

(الجاثوم)

اللي درس في ابتدائية التيسير بالرياض قبل كم سنة

لابد انه يتذكر مسفر (اسمه الحقيقي )

واللي ما راح يتذكر ( مسفر ) لابد انه بيتذكر (نبيل ) وهذا اسمه اللي اشتهر فيه

والسبب انه تماما يشابه شكل نبيل وزنا ولونا

كنا صغارا نراه فنتذكر نبيل

نرى نبيل في التلفاز فنتذكره

لم يكن شريرا

ولكنه يا ويل اللي يخطي عليه

لم يكن يرد الإساءة بنعته بال(دب) داخل المدرسة

كان ينتظر حتى نخرج من المدرسة ليتربص بمن يريد

حتى إذا أمسك به طرحه أرضا ثم مارس هوايته في تقليد

بطل المصارعة الشهير ( هولك هوجين ) ليبرك على خصمه

ويكاد يكتم أنفاسه ( تماما كالجاثوم) وهذا له قصة أخرى

بعد أن يبرك على خصمه يسأله سؤال واحد فقط : من عمك ؟

ليأتي الجواب سريعا : عمي مسفر

ليقوم مسرعا منتشيا وهو يتوعد خلني اسمك تقول يالدب

اشتهرت طريقة مسفر أو نبيل بين طلاب المدرسة

حاولوا تقليده فلم يستطيعوا

فارق الوزن كان هو الفيصل في نجاح تلك العملية الانتقامية

مع استمرار نعته بالدب استمرت عملياته ليتحول لقبه

أو عيارته للجاثوم

وما زلت أرى بقايا كتابة ( الجاثوم ) على جدران بعض الفلل القديمة في الشفاء

كان يفتخر بها ويراها نوعا من القوة

بل وأسس فريقا كان اسمه فريق الجاثوم

لم يكن يلعب الكره بل دوره الأساسي هو تجميع الفريق والاتفاق مع الفرق الأخرى

لإقامة المباريات

والتي يبدأ دوره الهام فيها بعد نهايتها

ليؤدب خصومه من الفرق الأخرى بطريقته المشهوره

لا زلت أتذكر آخر عهدي به عندما تشاجر مع حكم مباراة لفريقه

عندما لم يحتسب ضربة جزاء لفريقه أو كما نسميها آنذاك ( بلتي)

ليدخل الجاثوم للملعب ويطرح الحكم أرضا ليبرك عليه سائلا إياه :

البلنتي صحيح والا لا ؟

ليأتي الجواب سريعا : إلا بلنتي ونص

من هنا بدأت علاقتي الخاصة مع الجاثوم الخيال

لا مع الجاثوم المتجسد أمامي بصورة مسفر

كنا معزومين في استراحة ( نصف القمر )

في الحزم

هناك مارسنا كل مايخطر على البال من ألعاب

سباحة / كرة قدم / تقاذف ببلونات الماء

كان التحدي المشهور أن نحضر قطعة النقود المعدنية من أسفل المسبح

لم نكن نترك شيئا يمنعنا من الاستمرار في اللعب

حتى العشاء مجرد لقيمات سريعة عدنا بعدها للعب

حتى دورات المياه – أكرمكم الله – لم نتركها تأخذنا من المسبح

عدت ليلتها للبيت وكنت ممسوكا من يدي وأنا نائم

لتذهب بي والدتي لفراشي

الذي نمت وأنا في حالة لا زلت أتذكرها جيدا

كوكتيل من التعب والجوع و(الحصر )

نمت وزارني حينها لأول مرة في منامي ( نبيل )

رأيته وهو يبرك مانعا كل حواسي من العمل

لم أستطع الاستيقاظ

ولا الصراخ

ولا حتى الإحساس بالمكان والزمان

كنت حينها أنتظر سؤاله المعتاد

الذي تأخر كثيرا

ثواني وإذا بي أستيقظ مرددا

عمي مسفر عمي مسفر

متجها نحو دورة المياه وأنا أواري خجلا ملابسي المبللة !!!

باب ما جاء في الكلام الفارغ !!!

2012-01-21T13:21:00.001+03:00

في البداية سأعترف بنفسي وقبل ما يجي أحد يفتح باب أو حتى دريشة
ويجي ينبرش وكأنه لاقي له كنز
ليقول قدس الله سره وسلمت براجمه من الأوخاز
: صاد ترى موضوعك بايخ أو يصوغها ليمارس هواية الاستعراض اللفظي
دون الموضوعي ودون أن يرينا ولو لمرة واحدة كيفية الأبواب ذات الكلام الممتلئ
أو حتى النوافذ المفتوحة أو المغلقة
بل حتى الردود التي لا تتعدى سطرا أو بالكثير سطرين
ليقول : باب ما جاء في الكلام الفارغ

حسنا سأقولها قبلكم : باب ماجاء في الكلام الفارغ
وسأدعو الله سبحانه أن يكشف الضر عن كل كفيف
وكل أعمى ليريه الله جمال الحياة بألوانها المتعددة
وليرزقه الله بصبح أو بصباح جميل
بعد أن مل ويئس من السهر
==
اتفقنا انه الموضوع باب من أبواب صاد ذات الكلام الفارغ (حسب النظرية التأليفية)
أو فلنقل حسب النظرية الخشبية : نافذة مغلقة
لذا من يبحث عن شيء ممتلئ أو مفتوح فليس بالتأكيد عندي
وعموما حتى الأبواب أو الكؤوس الفارغة لها ألف فائدة وفائدة
وعموما مرة أخرى قرأت قديما أن فاقد الشيء لا يعطيه
وما زلنا عند الحديث حول الفارغ والمليان
فلا زلت أتذكر المثال الشهير حول الكوب أو الكأس
الذي يوضع فيه سائل للمنتصف
ثم يطرح السؤال : عن هذا الكأس ليأتي الجواب
معلنا عن الحالة النفسية لصاحب الجواب
فإن قال أن نصف الكوب فارغ فنظرته تشاؤمية
أما إن قال نصفه ممتلئ فنظرته تفاؤلية
هنا آن لصاد أن يمد رجليه متكئا على ذلك الباب
=
إعتراف آخر من صادّ
(حسب النظرية التأليفية : كتاب – أبواب – فصول ... الخ) :

الحب لعبة والعشق كله أوهام
الكذب جولة والصدق ألف جولة
متى المهمش في حياته يجي هام ؟
عايش وكل الناس ماهم (ب) حوله
الدرب طال وقصتي كلها أفلام
زهقت من تمثيل دور البطولة
مليت من شعري وحبري والأقلام
(نزفي ) كتاب وماتت أغلب فصوله
مليت من جدة ومشتاق للشام
فيها نعيش الجو على أصوله==
وعلى طاري الشام هالأبيات كتبتها قبل كم يوم :

أمحق خطاب إن كان كله جراثيم
أقطع يميني كان عندك مناعة

الشعب مل الظلم والقهر والضيم
والجيش جهده بس قتل بفظاعة
عن شامنا لابد ينزاح هالغيم
أكيد دام الشعب كله شجاعة

====
نجي لموضوع للكلام الفارغ الجديد :
اعرفكم على صديقي ( ابو هاجد )
وعلى فكرة يوم سألته ليش مكني نفسك قبل العرس
قال هاجد هو اسم الوالد وأنا أفخر به وباسمه
أكبرت فيه هذا الفخر
هو صديق طفولة اسمه (سرور) على اسم جده
عشت معه كثيرا
تعجبني فيه صراحته
واعتزازه بنفسه
سألني صادّ ماقد صرت مطوع؟
- كلنا والحمد لله ذلك الرجل ونصلي ونخاف الله صحيح أدخن وأسافر برا
بس أدعي الله يهديني
- أقصد ياصاد ماقد قصدت في أحد مطوع ؟ شيخ مثلا؟
- إلا قد كتبت كم بيت في سلمان العودة

- ياليت نسمعها ؟
- أبشر والله :
أكيد نغلي واحدن مانشوفه
مواقفه تنبض شموخ ورجوله

ما يمنعه من قولة الصدق خوفه
نحو العدل والحق تمشي رجوله

واذا رحل نصفق يدينا حسوفه
ونقول كانت له مع الحق جولة

احترت كيف أكتب مزايا وصوفه
يكفي أقول انه بذاته بطوله
- صح لسانك ياصادّ
- صح بدنك يالغالي ( بغيت أقول له : لك ألف شكر من صادّ ) بس انتبهت اني مو بالاقلاع خخخخخخخ
صديقي ابو هاجد لا يخجل من أي شيء يرى غيره أنه عيب
يعترف كثيرا : أبوي كان سواق خطوط
بالرغم من أن هذه المهنة – ربما نظر لها كثيرون –
على أنها ليست نظيفة نوعا ما ( والكلام عن الأسباب يطول)
بل إنه - أي زميلي ( ابو هاجد )
وضع صورة لسيارة والده الصفراء
والتي كان يعمل عليها
في صدارة مجلسه

كلما رأيتها ازددت تأكدا
أن كثير من المهن في مجتمعاتنا العربية
هي مهن مظلومة وأصابها مظلومون
سألته ونحن متحلقون على النار في ( ملحق بيتهم )
سرور وش أغرب موقف مر على الوالد في حياته
وقبل ما تعلمني أبشترط ان الموقف كان مع سيارته الصفراء
رد بعفويته : اوووووه ياكثرها
أصلا مواقف الوالد أغلبها إما داخل سيارته أو معها
يا رجل عشرة عمر معها
تدري انه للآن محتفظ فيها في مزرعته بالدوادمي ؟
ورافض يبيعها
واللي مخليه ما يصلحها ويستعملها
هو سبب واحد : لم يجد أكثر قطع غيارها
وإن وجدها فهي غالية عليه
واكتفى بالنظر لهيكلها صباح مساء بالمشاركة مع ذود الإبل الذي يمتلكه
- طيب خل عنك الفلسفة وعطنا أبرز موقف
- أبشر ياصاد :
- يقول الوالد :
مر علي وقت تعطلت المصلحة وما اشتغلت فيه
وما دخلّت ريال واحد
أما السبب فكان إن السيارة متعطلة
وما عندي إجرة تصليحها يالله اللي معي يعبي بنزين
خبرك ماجت به غدت به
مدخول اليوم واليومين نكد به على البيت
المهم وانا في ذاك الموقف
مر علي واحدن أعرفه ويعرفني من أهل الشرقية اسمه سليمان
وعقب ماسلم علي نشدني
وراك يبو سرور ما تشتغل لك كم يوم
- أبد والله السيارة متعطلة وتبي تصليح
- أفا وانا سليمان أبشر والله بتصليحها وعلى حسابي
- كفو ياسليمان
- بس ترى أبيك يبو سرور عقب ما أصلحها توديني للدمام
- أبشر والله من يوديك
- وترى المشوار كله لي (خصوصي)ماتركب معي أحد
أنا أصلح لك الموتر بقطع الغيار وانت توديني للدمام
- أبد ما يركب أحد يكفي انك بتصلح لي الموتر ببلاش
ويوم أصبحنا من بكره والى سليمان جاي وجايب معه واحد معه شنطة عدة
فتح الكبوت وقام يناظر لقى السير منقطع
طمر سليمان وجاب سير
- العذر والسموحة يبو سرور مالقيت إلا سير تجاري الأصلي يقولون في جدة
ويبي له كم يوم الين يوصل للرياض
المهم ركبوا السير وقال لي سليمان ترى المهندس بيروح معنا
(وهو لامهندس ولا شي مجرد ميكانيكي تعلم الشغلة بيومين )
- مايخالف ياسليمان السيارة فاضية
ومشينا للدمام وانا ببالي ان المكسب هو في تصليح السيارة
وعارف ان سليمان مهوب معطيني شي
بس في بالي ان السيارة مافيها الا أنا وسليمان
هالحين صرنا ثلاثة انا وسليمان والميكانيكي
بدت تطلع علي هالسفرية بشي من الخسارة
(اجرة راكبين للدمام تجيب قيمة سير أصلي واجرة تركيبه)
طردت هالتفكير من راسي وتعوذت من الشيطان
وسميت باسم الله ويوم طلعنا من الحارة التفت لي سليمان :
الله لايهينك يبو سرور أبيك تمر الملز بيخاوينا ولد عمي حمد
ومريت الملز
( صرنا هالحين أربعه )
قلت في نفسي أكيد بيعطيني سليمان اجرة حمد
ويوم ركب حمد والى سليمان يقول تراك ياحمد انت اللي بستلم
الاجرة من الركاب واذا وصلنا للدمام بنتحاسب مع ابو سرور
- أبشر والله ياسليمان
- كفو ياحمد تستاهل الأبيات اللي كتبتها فيك :

-
تجمعت كل الصفات الحميدة
قدام عيني ياحمد قول وأفعال

انت بعيوني شي كنك قصيدة
وانت اختصار بجد لا قيل : رجال

لبى حمد ياقلب لبى وريده
لبى سما عمري على كل الأحوال
- صوت جماعي : صح لسانك ياسليمان !!

ومسكنا الخط ووقفنا عند محطة البنزين أعبي بنزين

- عب يابو سرور واذا وصلنا للدمام تحاسبنا
وراح سليمان وجاء ومعه راكب
صرنا خمسة أنا وسليمان وحمد والميكانيكي
والراكب الجديد اللي عرفت انه يماني من شكله
ومن لهجته مع حمد وهو يتحاسب هو وياه
ويوم مشينا كم كيلو وكان الخط ذاك الوقت
فيه تحويلات وكان شاق بالمرة

لقينا راعي ابل (سوداني) يأشر
قال لي سليمان : وقف يبو سرور
وقفت وركب معنا الرجال وصرنا ستة أربعة وراء واثنين قدام
اللي وراء اليماني والسوداني والميكانيكي وحمد
وقدام أنا وسليمان
وفي الطريق قلت : ماشاء الله من زمان ما طلعت لدمام والسيارة مليانه
( قلتها أبي سليمان يفهمها وماعاد يركب أحد وبالمرة ينتبه للحساب )
- أبشر بالخير يابو سرور
وما أطول عليكم وصلنا للدمام
وكان الوضع كالتالي
الحساب مع حمد
سليمان على باله تصليح السيارة وشراءه للسير يكفيني أجره مشواره للدمام
نزلوا من السيارة ويوم أقفوا وانا أنادي سليمان وهو يعد الفلوس اللي أخذها من حمد
- تبيني أرجعك للرياض ؟ ترى بجلس هنا كم يوم
- لا الله يبو سرور أنا هالحين بلشان بخسارتي
- سلامات ؟ أي خسارة ؟
- أبد مافيه شي بس تستاهل والله من يصلح سيارتك حتى لو طلعت خسران
- رديت عليه : وذا الدراهم اللي عطاك حمد ؟
- اسأل حمد وهو يعلمك كم قيمة السير وكم اجرة الميكانيكي
- لا وازيدك من لشعر بيت ترى فيه ناس ركبوا وماعطوا حمد ولا ريال
- تدري يابو سرور طلعت خسران خمسين ريال بس تراها فداك
أقفى سليمان وأنا أقول في نفسي : طيب قيمة البنزين على الأقل ؟
وفي طريق العودة للرياض وقفت السيارة ويوم فتحت الكبوت لقيت السير منقطع !!!

وداعا ً أيها البطل ... سنفتقدك يا أسامة !!!

2012-01-21T13:13:00.002+03:00

دوي صفارات الإنذار
النداء الداخلي يعلن التالي:
نداء لجميع مشرفي ومشرفات القهوة
التوجه فورا لقاعة الإجتماعات

نهاري خارجي :
صورة من بعيد لمبنى زجاجي
زوم للوحة نيون ضخمة فوق المبنى :
مجموعة الإقلاع القابضة - نت - tv - استثمار تنتقل الكاميرا لمنظر داخلي
داخلي نهاري :
المكان : قاعة الإجتماعات
مزودة بشاشات عملاقة تنقل صورة من القسم النسائي والعكس
الحاضرون :
مضطهد ( يعجبه الكرسي الدوار ) فيبرم برمة يتسلى بها
وصعب يتسلى في الآي باد اللي توه شاريه
يضي ء زر طلب الحديث من القسم النسائي ليتوقف مضطهد عن الدوران
ويتحدث مع صعب : قسم بالله بربيكان بيفشلنا مع الجماعة
أجل لنا ربع ساعة طالبين الاجتماع وهو توه ماجاء
ياخي تخلون الواحد يفكر يروح لمنتدى مملكة المرأة أحسن من القهوة
يرد صعب : بس طال عمرك هذاك لليوزرات النسائية ممنوع على الرجالية
يرد مضطهد : النسائية ياحليلهن
منضبطات ويحافظن على المواعيد
شفهن مرتزات في القاعة من الساعة ست الصباح
واللي جايبة زمزمية قهوة
واللي جايبة فطاير
ينتبه مضطهد لطلب الحديث فيفتح الخيار للكلام طوال الجلسة بدون أخذ الأذن منه
ترد دوبة ولكن : مو فطاير طال عمرك ذي دونات
يغضب مضطهد : دونات والا فطاير كلهن يوكلن
وانت يا صعب يالله جريناك من فراشك
وخويك ذاك توه ماجاء
يكتب صاد : ميد بربيكانيحاول صعب ارسال رسالة لبربيكان عن طريق الواتس اب يستعجله في الحضور
يتململ مضطهد وهو يتساءل : أموت وأدري وين يسعسع فيه هالادمي ( يتذكر صاد هنا مشهد هتلر وتلاعب الشباب السعودي به اللي كل يوم حاطين له موضوع ومترجمين كلامه بما يتلاءم مع أهدافهم)
انثى زجاجية تطلب الحديث
فيوافق مضطهد
طال عمرك هو ماخذن المفاتيح ورايحن يقفل له كم موضوع وبالمرة يوزع له كم كرت انذار هنا تكمل هدوء الكلام : ترى مالها الا رجالها طال عمرك بربيكان هو اللي متزهل بالمهمات الصعبة اللي هي التقفيل والمخالفات واحيانا يودي للحاير
يكتب صاد : طبعا بعد استشارة المراقبين والمسؤلينيحدث مضطهد نفسه : هذا اللي مصبرنا عليه والا عيال الناس واجد
يرد صعب : ورى ما نبدا الاجتماع واذا جاء بربيكان نعلمه ويوقع على محضر الاجتماع
يرد مضطهد : اذا ماجاء بربيكان ترى الاجتماع فركش
يكتب صاد: ظلال خالد الطخيم خخخخخخ
هنا يدخل بربيكان متابطا حلقة ضخمة من المفاتيح وحاط على عيونه قناع اسود
ولابس على ظهرة خرقة سوداء
يبادره مظطهد : حشا زورو !!!!
ضحكات تعلو من القسم النسائي
ويحلفون ان وحدتن منهن طاحت من الضحك من على الكرسي
يكتب صاد : فك الله الزمزمية !!!
وينك قيه؟ - يتساءل مضطهد
يرد بربيكان : قسم بالله شي يقهر
كارفينا كرف وبعض الناس مغير قهاوي وشواهي وفطاير
يرد مضطهد : دونات ياغبي
بربيكان : دونات والا فطاير المهم ياكلون وحنا مغير دوران تقفيل وكروت
قسم بالله اني قاري في الحمامات
يسقط بربيكان = ساهر
معيريني طال عمرك ساهر
هنا يسقط واحد من القسم الرجالي من على كرسيه من الضحك
!!!!!
جابوها والله يقولها مضطهد وهو يعدل جلسته
هاه بشر يا بربيكان عساك قفلت موضوع صادّ؟
- أي واحد طال عمرك ؟
يرد صعب : ياخي هالادمي بذنا
كل يوم والثاني موضوغ تقل نشتغل عند امه؟ توي قبل فترة مقفل له موضوع

تجيب هدوء : استاذ بربيكان قصد مضطهد موضوع : وداعا أيها البطل .... سنفتقدك يا أسامه !!
يجيب بربيكان : لا والله ماقفلته
عجزت القى له سبب للتقفيل
هالادمي سحبنا على وجيهنا وجيناك طايرين ومالقينا شي
بس ولا يهمكم عطيناه كم انذار

يرد مظطهد : المفروض تقفل موضوعه
شفه كاتب اسمي بالظاء مو بالضاد
بربيكان : مغير مرة وحدة وانت طال عمرك منبه بالتغاضي عن اللي يخطي باسمك مرة وحدة .
ومع ذلك يجب ان نبت بهالموضوع
ونقرر
تقول دوبه : ورى مانقراه كلنا همن نقرر
يرد مضطهد : ويلوموني فيكن يا بنات القهوة خلاص تقراه وحدتن منكن
تبدأ دوبه بالقراءة
العنوان : وداعا أيها البطل .....سنفتقدك يا أسامه !!!
الكاتب : صادّ
==
ولد لأب كثير الأولاد
عاش مترفا
متنقلا بين البلاد العربية والا وربية صيفا وشتاء
عرف عنه الهدوء
يميل كثيرا للصمت
حقاني وماعمره أكل حق أحد
يجيد لعب التايكندو
ويتحدث الانجليزيه بطلاقه
عاش في كنف والدته بعد وفاة والده
وقفي << يقولها مضطهد
تتوقف القراءة
وش رايك ياصعب ؟
والا فالحن في ترصيص هالايباد
صعب : عادي مافيها شي
اجل كملي: يقولها مضطهد
تكمل القراءة هدوء
فيقاطعها مضطهد : وين راحت دوبه
جاها برود كاست طال عمركتكمل هدوء
ونشأ بلاعيوب
عدا عيب واحد
كان يتجاهل تحذيرات الجميع
ماله الا اللي براسه
ونستطيع ان نقول انه يقاتل من اجل افكاره
يقاطع بربيكان : سمعتوا ؟ صاد يقول : يقاتل المفروض منفوحة طوالي
ترد دوبة : ممكن اقول شي؟
تفضلي : يرد مضطهد
يقاتل تعبير مجازي هنا وماله دخل بالرصاص
اجل كملي القراءة
تكمل :
ونستطيع أن نقول أنه يقاتل من أجل أفكاره
لم تستطع والدته أن تثنيه عن فكرته الرئيسية : كان يحب الشيبس
ومتولع في أكله
لدرجة انه يفطر شبس
ويتغدى شبس ويتعشى شبس
أخذته والدته للطبيب ليعالجه
فرفض أخصائي التغذيه علاجه
ونصح والدته بعرضه على طبيب نفسي
لان تعلقه بالشبس شي نفسي لا غذائي
وفي عيادة الطبيب النفسي
تحدث بطل قصتنا واللي نسيت أعلمكم ان اسمه صاد
عن بداية تولعه بالشبس
كنت ً( ميد الدكتور ) مااحب الا اكل البيت
الين شفت دعاية لمنتج جديد وماكنت ادري وشو
يسأله الدكتور النفسي : وش كان اسمه ؟
يرد صاد : اسمه شبس البطل

- اها كمل
- كانت الدعاية عن وجود فلوس في كل علبه بطل
وقعدت اشتري ابي تطلع لي خمسميه
- وطلعت لك ؟
- للأسف لا طلع لي هالكرشة من كثر ما أكلت البطل
- طيب انت تاكل البطل متى أكثر شي ؟
- إذا ضاق صدري
- ومتى يضيق صدرك ؟
- اذا عيروني بالكويحة
- يعني ايه كويحة؟
- ماتشوفني يا دكتور ؟
- الا اشوفك واسمر زي العسل
- بالضبط اللي اسمر عندنا يسمونه كويحه
- وماله كويحة كويحة بس ممكن ادلعك : كوكو
- حتى انت يادكتور؟
- خلاص كانها تضايقك هونا منها
- بالعكس ماتضايقني لدرجة اني يادكتور كتبتها في قصيدة شعرية
- اوه شاعر ياصاد؟
- شاعر ونص
- طيب سمعنا قصيدة الكويحة ؟
- تبيها بقصتها والا بدون؟
- ليش القصايد الثانيه معاها جنسية سعودية وكويحة بدون؟
- الله يخلف على امن جابتك يادكتور
- امزح ياصاد ترانا في قهوة الاقلاع لاتصدق اني دكتور تراي اسلك لك قصتك وأهم شي هات القصيدة
يجلس صاد ويطلع من مخباته سبحه
شف يادكتور هذي وحدة اشغلت والديني ارسل صورة ارسل صورة
وعييت
قالت طيب ابشوفك على الطبيعة
وتعللت وتعذرت بالهيئة وما طاعت

الين جاء ذاك اليوم اللي شافتني فيه
رغم اني قايل لها تراني اسمر وقارية قصيدتي : ماعاد به ذود
بس كانت تقول انت ياصاد تبي تبعد المعجبات والا اتوقع انك وسيم وابيضاني
وكنت احلف لها وماتصدق الين شافتني
مرة طلبت مني بيتين عالسريع ( عالمسن) وتعذرت ان عندي موعد بمستوصف البستان
وما صدقت خبر اثرها سابقتنا هناك
( إن كيدهن عظيم)

ورحت لمستوصف البستان اللي بطريق الحجاز
ومعي الوالدة وبينما انا بالانتظار ( الرجال) رن جوالي الايفون بينما كنت أتصفح الاقلاع بالسفاري وكنت خاش بيوزري : صادّ وكان خالي فهد يبي يكلم الوالدة
طمرت لانتظار النساء وطلبت الوالدة وعطيتها الايفون تكلم ويوم قضت الى جنبها وحدة عطتها الايفون:
تكفين يابنيتي سكريه هذا جوال ولدي ومنيب اعرف له وما امداها تعطيهياه الا والممرضة تطلبها للدخول على عيادة القلب قالت الوالدة خليه معك الين اجي
وقعدت هالبنت تتصفح وشافت اني خاش بيوزر صاد وقعدت تتصفح الين جت امي وعطتها الجوال
وانا كل هالوقت اتوقع ان الجوال مع الوالدة
ويوم نادتني امي وعطتني الجوال عرفت انه كان مع احد غيرها
كان فيه دخول لمنتدى مملكة المرأة بالاقلاع
سالتها يمه مت اللي لاعبن بالجوال؟
- عسى ماخرب؟
- لا بس فيه احد ماسكه؟
ايه هذي وحده خليته معها الين طلعت من الدكتورة
- اييييييييه
ومن ذاك اليوم صدقت بنت الحلال واقتنعت اني اسمر بالرغم من انها ماشافتني بس شافت امي

ويوم قعدت كم يوم والا البنت متغيرة ومرسلتن لي رسالة خاصة ع الجوال كتبت فيها : اكرهك يا صادّ

عندها كتبت هالقصيدة ( تنشر لأول مرة ) وتستاهل القهوة من يخصها بالنشر الأول وهالقصيدة بعنوان : اكرهيني اقول فيها :

اكرهيني

اكرهيني كان يطلع لك مجال
واتركيني كان نوري يجهرك

فلسفات الكره تحتاج لسؤال
والجواب أكيد قلتي : مظهرك

أعترف لك : شين وكويحة وخال
لكن الأخلاق عندي تبهرك

واعترف : مليت وهمومي ثقال
كان قربك ليل مابي أسهرك

وأعترف لي قلب مايملك حلال
خاطبوه الناس قالوا : مطهرك

وش يفيد الشكل وأنواع الجمال
مع بليد إحساس؟ والله يقهرك

لامتى تقفين وتقولي : تعال
جربي غيري وربي : ينهرك

بكتفي بأبيات يتبعها مقال
لا تظنين ( التكبر ) يشهرك

اكرهيني موت يا ثلج الشمال
أشرقت شمسي وبكره تصهرك
يصفق الدكتور وهو يقول : صح لسانك يا صاد أبيات حلوة
وكمل الجلسة معي وعطاني كم علاج وكم موعد
وكلمة حق بفضل الله ثم بفضل هالدكتور استطعت اني اقولها وبالفم المليان : وداعا ً أيها البطل
ومن عقبها ماعاد طب بطني لا بطل ولا ليز

وبعد كم يوم تفاجأ الدكتور اني ادخل عليه
- سلامات يا صادّ
- الله يسلمك
- عندي مشكله ديدة
- بطل برضه ؟
- ايه بطل بس غير
- كيف يعني؟
- هالمرة بطل دوري زين
- الهلال ؟
- ايه الهلال
- وش فيه ؟
- ودي أفرح مثل جماهيره
- وانت وش تشجع؟
- ما اشجع الهلال
ودي افرح ودي افوز
وما قصر الدكتور بعد كم جلسة اقنعني بالهلال وصرت افرح الين امس رحت للدكتور
- سلامات ياصاد
- الله يسلمك وش فيك ؟ بطل برضه؟
- ايه بطل ونص
- مين ؟
- ماتدري عندنا مباراة مهمة مع الاتحاد
- طيب الهلال قدها
- بس بنفقد بطل؟
- مين ؟
- أسامه هوساوي
يناول صاد الدكتور قصاصة من جريدة الرياض

- طيب وش رايك ياصاد هالمرة منيب معالجك ابعطيك فكرة تخفف عنك
- وش؟
- اكتب مقال عن هالموضوع
- بسيطة يا دكتور
- اكتب واضمن لك تطيب
- ازهلها يادكتور بسيطة بس تدري وش عنوان المقال ؟
- وش ؟
- سنفتقدك يا أسامه .
هاه نقفله والا نحذفه ؟طال عمرك ؟ يتساءل بربيكان
يقف مضطهد وهو يضع القلم في جيبة وهو يقول : إلا ثبتوه !!!!

تمت

الإتحاد بكل حالاته انجاز

2012-01-21T13:10:00.002+03:00

الإتحاد بكل حالاته انجاز

الإتحاد بحد ذاته بطوله

اتي ونفخر به ولو كان مافاز

رابع نهائي كاس يضمن وصوله

اتي وديمتري تشقلب بجمباز

واللي يشوفه قام يبدي ذهوله

كان البطولة تنتظر فك الالغاز

الاتحاد يحلها في سهولة

ماكنه الا جيب فكسار هزاز

عشق دبل واقفى ومحدن يطوله

لا تسألوني ليه للفن منحاز

اتي ويعزف فن نعشق أصوله

اتي وكله مجد وإبداع وإنجاز

( بذن ) الإله نجيب كاس البطولة

اكرهيني

2012-01-21T13:08:00.001+03:00

اكرهيني كان يطلع لك مجال
واتركيني كان نوري يجهرك

فلسفات الكره تحتاج لسؤال
والجواب أكيد قلتي : مظهرك

أعترف لك : شين وكويحة وخال
لكن الأخلاق عندي تبهرك

واعترف : مليت وهمومي ثقال
كان قربك ليل مابي أسهرك

وأعترف لي قلب مايملك حلال
خاطبوه الناس قالوا : مطهرك

وش يفيد الشكل وأنواع الجمال
مع بليد إحساس؟ والله يقهرك

لامتى تقفين وتقولي : تعال
جربي غيري وربي : ينهرك

بكتفي بأبيات يتبعها مقال
لا تظنين ( التكبر ) يشهرك

اكرهيني موت يا ثلج الشمال
أشرقت شمسي وبكره تصهرك

( صار التخصص فوزنا بالثلاثة )

2012-01-21T13:02:00.001+03:00

اتي وليلة فوز وألفين مبروك

جينا نبارك فوزنا بالثلاثة

جمهورنا الغالي مع الفوز هنوك

جمهور يعشق فن ماهو وراثة

اتي و ياما للبطولات زفوك

أصالة الماضي وفيك الحداثة

ماهمك اللي في طريقك زرع شوك

حرثت ملعبهم بأحلى حراثة

وماهمك اللي في الصحافة تناسوك

رغم انهم من جد فيهم غثاثة

اتي وأقول اليوم ألفين مبروك

صار التخصص فوزنا بالثلاثة

نادي النصر سارق قلوب الملايين

2012-01-21T12:59:00.000+03:00

نشر هذا الموضوع بتاريخ 26 /4/ 2011

لأنه النصر

فحبه لايرتبط بفوز أو ببطوله
حب يجري في دماء محبيه
يتنفسونه كالهواء
ولأنه فخر لي ولكم
كتبت هذا الأبيات التي أرجو أن تنال الاستحسان
وأراها أقل مما يستحقه هذا الكيان
==
نادي النصر سارق قلوب الملايين
من أول الدنيا إلى آخر الصين
يستاهل الأمجاد يستاهل الزين
والعالمي نادي قلوب الملايين

أول كلامي يستحقه كحيلان
تعزف له الأبيات أنغام والحان
بانت جهوده زين من عدة أزمان
نادي النصر سارق قلوب الملايين

اما انت ياماجد رفيق البطولات
لك في كتاب المجد صوله وجولات
تتعب حروفي والقصايد والابيات
في العالمي نادي قلوب الملايين

يا عامر السلهام افضل اداري
تبذل جهودك دوم والكل داري
تعاملك والله تعامل حضاري
في العالمي نادي قلوب الملايين

نبدا من الحراس والكل راضي
تسلم يدينك ياحبيبي ياراضي
ماعندنا للفن أي اعتراضي
في العالمي نادي قلوب الملايين

عبدالله المبدع أمير الحراسه
يسلم لناوقت المباراة راسه
لامن جته شوتات ياقو باسه
في العالمي نادي قلوب الملايين

وابو عمر ربي يسلم رجوله
كابتن و لعبه فن على اصوله
باذن الاله نجيب معه البطوله
في العالمي نادي قلوب الملايين

كفيت يالدوخي لك الله ووفيت
ياما تعبنا لين للعالمي جيت
للي يجي بعدك اجل ويش خليت؟
في العالمي نادي قلوب الملايين

والحارثي لله ياناس دره
هداف يسقي الخصم من كاس مره
يكفيه ربي من طريق المضره
في العالمي نادي قلوب الملايين

سهلاوي الاهداف عنده هوايه
حكايته يازينها من حكاية
الفوز عنده بس مطلب وغايه
في العالمي نادي قلوب الملايين

عباس يافنان والمخ كورة
يزداد ملعبنا اذا جيت نوره
حطيت لك ف كتاب الاهداف صوره
في العالمي نادي قلوب الملايين

والزيلعي من جد والله وليده
له دور لامن طب محدن يجيده
يعزف لنا الابداع احلى قصيده
في العالمي نادي قلوب الملايين

برناوي الغالي ظهير وخرافي
لامن وعد لابد للوعد يافي
قذايفه بلسم وللقلب شافي
في العالمي نادي قلوب الملايين

قحطاني انت اليوم رمز الاناقة
انا اذكر الله بس كلك لياقة
لك من جماهيرك من الورد باقه
في العالمي نادي قلوب الملايين

لمسات ساهر كلها عند غالب
ساحر يطيع الله وللقلب سالب
ثعلب على الميدان ماله مخالب
في العالمي نادي قلوب الملايين

احلى بيوت الشعر للشيخ ريان
سطرت بالاخلاق صفحة وعنوان
الله يديمك ذخر ياعالي الشان
في العالمي نادي قلوب الملايين

عبدالله القرني مدافع وصخره
يامالعب للنصر وازداد فخره
هو للنصر في قادم الوقت ذخره
في العالمي نادي قلوب الملايين

عبدالكريم اليوم لعبه مثالي
لاعب طرازه غير ياويل حالي
عشق لجماهير المدرج شمالي
في العالمي نادي قلوب الملايين

هوساوي الإمتاع والفن والذوق
في قمة الابداع يختال من فوق
للجندي المجهول لمسات برفوق
في العالمي نادي قلوب الملايين

أسعدتنا ياعيد لعبك حماسي
تستاهل من اليوم تلعب أساسي
قدرك على عيني ومن فوق راسي
في العالمي نادي قلوب الملايين

اما سعود حمود مشكور حرصه
يصنع من اللاشي مليون فرصه
له من بيوت المدح لاشك حصه
في العالمي نادي قلوب الملايين

بدر المطوع كلنا به نهلي
ترسانة الإبداع لعبه يسلي
مانعتبره إلا كلاعب محلي
في العالمي نادي قلوب الملايين

اما الاجانب كلهم ياحلاهم
فيجاروا فنان بيتري معاهم
والداهية ماكين كمل عطاهم
في العالمي نادي قلوب الملايين

حكاية الجمهور والله حكاية
مجنون عشق وحبك اليوم غاية
وافي ولا يقبل بحبك وصاية
والعالمي نادي قلوب الملايين